കൈകാണിച്ചിട്ടും ബസ് നിര്‍ത്താതെ പോയതില്‍ കുപിതയായ വനിതാ പോലീസ് സ്വകാര്യ ബസ് ഡ്രൈവറെ കൈകാര്യം ചെയ്തു, യാത്രക്കാര്‍ പകര്‍ത്തിയ ദൃശ്യങ്ങള്‍ പുറത്ത്
സ്വകാര്യ ബസ്, സ്‌റ്റോപ്പില്‍ നിര്‍ത്താതെ പോയതിന് യൂണിഫോമില്‍ എത്തിയ വനിതാ പോലീസ് ബസ് ഡ്രൈവറെ കൈയ്യേറ്റം ചെയ്തതായി പരാതി.
കോട്ടയം - എറണാകുളം റൂട്ടിലോടുന്ന ആവേ മരിയ ബസിന്റെ ഡ്രൈവര്‍ സോണി (23) യെ ആണ് കൊച്ചി മെട്രോ പോലീസ് സ്‌റ്റേഷനിലെ വനിതാ പോലീസ് തലയോലപ്പറമ്പ് സ്വദേശിനി ബബി മോഹന്‍ മര്‍ദിച്ചതായി പറയുന്നത്.
ഞായറാഴ്ച രാവിലെ 6.30-ന് എറണാകുളത്തിനു ഡ്യൂട്ടിക്ക് പോകാനായി വനിതാ പോലീസ് തലയോലപ്പറമ്പ് പള്ളിക്കവല സ്‌റ്റോപ്പില്‍ നിന്നപ്പോള്‍ വന്ന ആവേമരിയ ബസ് വനിതാ പോലീസ് കൈകാണിച്ചിട്ടും നിര്‍ത്തിയില്ലെന്ന് പറയുന്നു.
പിന്നീട് സ്റ്റാന്‍ഡില്‍ പോയിട്ട് പള്ളിക്കവലയിലേയ്ക്ക് തിരികെവന്ന ബസ്, സ്‌റ്റോപ്പില്‍ നിര്‍ത്തിയപ്പോള്‍ വനിതാ പോലീസ് കയറി. ബസ് കൈ കാണിച്ചിട്ട് നിര്‍ത്താത്തതിനെ ചൊല്ലി തര്‍ക്കിക്കുന്നതിനിടെ വനിതാ പോലീസ് ഡ്രൈവറുടെ കോളറിനു പിടിച്ചു വലിക്കുകയും മര്‍ദിക്കുകയും ചെയ്‌തെന്ന ഡ്രൈവറുടെ പരാതിയുടെ അടിസ്ഥാനത്തില്‍ പോലീസ് കേസെടുത്തു.
ബസിലെ തര്‍ക്കവും കലഹവും ചിലര്‍ മൊബൈലില്‍ പകര്‍ത്തി പ്രചരിപ്പിച്ചതോടെ സംഭവം വിവാദമായി. അതേസമയം ബസ് ഡ്രൈവര്‍ തന്നെ അസഭ്യം പറയുകയും മോശമായി പെരുമാറുകയും ചെയ്‌തെന്നാണ് വനിതാ പോലീസിന്റെ ആരോപണം.
https://www.facebook.com/Malayalivartha
