കാറും ബൈക്കും സ്വര്‍ണവും ഇലക്ട്രോണിക് ഉപകരണങ്ങളുമൊക്കെയാണ് മോഷ്ടാക്കളുടെ 'ഇഷ്ട വിഭവം' എന്ന് നമുക്കറിയാം. എന്നാല്‍ ആഹാരസാധനങ്ങള്‍ മോഷ്ടിക്കുന്നവരും ഉണ്ടെന്നറിയാമോ? അതും നൂഡില്‍സ് ആയാലോ? കേട്ടത് സത്യമാണ്. നൂഡില്‍സ് മോഷ്ടിച്ചു കടന്നുകളഞ്ഞ കള്ളന്മാരുടെ കഥയാണ് വാര്‍ത്തകളില്‍ നിറയുന്നത്. പത്തോ പതിനഞ്ചോ രൂപയുടെ നൂഡില്‍സല്ല എഴുപതു ലക്ഷത്തോളം രൂപ വിലമതിക്കുന്ന നൂഡില്‍സാണ് മോഷണം പോയത്.

മൂന്നാഴ്ച്ച മുമ്പാണ് ജോര്‍ജിയ ഹൈവേയിലെ ഷെവ്‌റോണ്‍ സ്‌റ്റോറില്‍ നിന്ന് റാമെന്‍ നൂഡില്‍സ് മോഷണം പോയത്. സ്ഥലത്ത് പാര്‍ക്ക് ചെയ്തിരുന്ന അമ്പത്തിമൂന്ന് അടിയുള്ള വാഹനത്തിലാണ് നൂഡില്‍സ് സൂക്ഷിച്ചിരുന്നത് മൂന്നുലക്ഷത്തില്‍പരം നൂഡില്‍സ് പാക്കറ്റുകളാണ് മോഷ്ടിക്കപ്പെട്ടതെന്നാണ് കരുതുന്നത്.

വാഹനം ലോക്ക് ചെയ്തിരുന്നുവെന്നും എങ്ങനെ മോഷ്ടിക്കപ്പെട്ടുവെന്ന് അറിയില്ലെന്നും വാഹന ഉടമ അറിയിച്ചു. അന്വേഷണം പുരോഗമിക്കുന്നുണ്ടെന്നും ഇതുവരെയും പ്രതികളെ കണ്ടെത്താന്‍ കഴിഞ്ഞിട്ടില്ലെന്നും പോലീസ് അറിയിച്ചു.

അതിനിടെ നൂഡില്‍സ് മോഷണത്തെ രസകരമായ ട്രോളുകളിലൂടെ അവതരിപ്പിക്കുകയാണ് സമൂഹമാധ്യമത്തിലെ വിരുതന്മാര്‍. നൂഡില്‍സിന് ഇത്രയും വലിയ കരിഞ്ചന്ത ഉണ്ടായിരുന്നുവെന്ന കാര്യം അറിഞ്ഞില്ലല്ലോ എന്നും ഒന്നരവര്‍ഷത്തേക്കുള്ള അത്താഴത്തിനുള്ള നൂഡില്‍സാണല്ലോ മോഷണം പോയതെന്നുമൊക്കെ പോകുന്നു കമന്റുകള്‍.