സോഷ്യല്‍ മാധ്യമ ലോകത്ത് ഒരു ചിത്രത്തിനു താഴെയായി എഴുതി ചേര്‍ത്ത ഒരു വാചകം, പറയാതെ പറയുന്നത് വര്‍ത്തമാനകാല കേരളത്തിന്റെ സാക്ഷ്യമാണ്. 'ഈ ചിത്രത്തിന് അടിക്കുറിപ്പിന്റെ ആവശ്യമില്ല' എന്നായിരുന്നു ആ കുറിപ്പ്.

പ്രളയദുരിതത്തില്‍ നിന്നു കരകയറാന്‍ പെരുതുന്ന കേരളത്തിന് കുഞ്ഞുകൈതാങ്ങുകളാണ് ഏറെ പ്രചോദനം. അത്തരം വാര്‍ത്തകളുടെ 'പ്രളയ'മാണ് രണ്ടുനാളായി. ഈ വാര്‍ത്തകള്‍ പ്രചോദനമാകുന്നു എന്നതിന് ഈ ചിത്രത്തിനപ്പുറം തെളിവുവേണ്ടെന്നാണ് ചര്‍ച്ച.

ദുരിതാശ്വാസ ക്യാംപിലേക്കുളള സാധനങ്ങളുമായി എത്തുന്ന ഒരു കൊച്ചു പയ്യന്റെ ചിത്രമാണ് സോഷ്യല്‍ മീഡിയയില്‍ വൈറലാകുന്നത്. ഒരു സഞ്ചിയില്‍ സാധനങ്ങളും തൂക്കി പിടിച്ച് കളക്ഷന്‍ പോയിന്റിലേക്ക് നടക്കുകയാണ് ഈ കുട്ടി. അവിടെയുണ്ടായിരുന്ന വ്യക്തിയുടെ കയ്യില്‍ സാധനങ്ങള്‍ നല്‍കുന്ന ചിത്രവും കൂട്ടത്തിലുണ്ട്.

അവന്റെ മുഖത്ത് വിരിയുന്ന ചിരിയാണ് കേരളത്തിന്റെ അതിജീവനത്തിന്റെ നേര്‍ചിത്രം. ചില ചിത്രങ്ങള്‍ക്ക് അടിക്കുറിപ്പിന്റെ ആവശ്യമില്ലെന്നു പറഞ്ഞ് ഈ ചിത്രം ട്വിറ്ററില്‍ പങ്കുവച്ചതോടെ ഈ മിടുക്കന്‍ താരമായി!