കാമുകന്മാര്‍ പല വിശേഷപ്പെട്ട സമ്മാനങ്ങളും പ്രണയിനിക്ക് നല്‍കി അത്ഭുതപ്പെടുത്താറുണ്ട്. അത്തരമൊരു സമ്മാനം നല്‍കുവാന്‍ ശ്രമിച്ച് എട്ടിന്റെ പണി ലഭിച്ചയാളുടെ കഥയാണ് ചൈനയിലെ ചെങ്ക്ഡു പ്രദേശത്ത് നിന്നും കേള്‍ക്കുന്നത്.

വിലകൂടിയ ഒരു പുതിയ കാര്‍ വാങ്ങി നല്‍കാമെന്ന് ഇയാള്‍ കാമുകിക്ക് വാക്കു നല്‍കി. എന്നാല്‍ അതിനാവശ്യമുള്ള മുഴുവന്‍ പണം അയാളുടെ കൈയ്യില്‍ ഇല്ലായിരുന്നു. എന്നാല്‍ കാമുകി ഇത് മനസ്സിലാക്കാതിരിക്കാന്‍ അദ്ദേഹം ഒരു മാര്‍ഗവും മനസില്‍ കണ്ടിരുന്നു.

കാമുകിക്ക് വാക്ക് നല്‍കിയ ദിവസം അദ്ദേഹം അവരെയും രണ്ട് സഹോദരന്മാരെയും കൂട്ടി കാര്‍ ഷോറൂമിലെത്തി. പണം പൂര്‍ണമായും തന്റെ കൈവശമില്ലെന്നും അല്‍പ്പ സമയം കാത്ത് ഇരിക്കൂ, പണവുമായി ഉടന്‍ എത്താമെന്ന് അവരോട് പറഞ്ഞിട്ട് അയാള്‍ ഷോറൂമില്‍ നിന്നും പുറത്തേക്ക് പോയി.

അവിടെ നിന്നും പോയ ഉടന്‍ തന്നെ അദ്ദേഹം സമീപത്തുള്ള ഒരു കടയില്‍ നിന്നും ഒരു കത്തി വാങ്ങി അതുപയോഗിച്ച് സ്വന്തം കൈയ്യില്‍ മുറിവേല്‍പ്പിച്ചു. എന്നിട്ട് ഉടന്‍ തന്നെ കാമുകിയെ വിളിച്ചു പറഞ്ഞു, ഞാന്‍ പണവുമായി തിരികെ വരുന്ന സമയം മോഷ്ടാക്കള്‍  ആക്രമിച്ച് പരിക്കേല്‍പ്പിച്ച് പണം കവര്‍ന്നുവെന്ന്. ഉടന്‍ തന്നെ കാമുകിയും സഹോദരന്മാരും അവിടെ എത്തി. എന്നാല്‍ കാര്യങ്ങള്‍ ഇവിടം കൊണ്ട് അവസാനിച്ചുവെന്ന് കരുതിയ അദ്ദേഹത്തിന്റെ കൈയ്യില്‍ നിന്നും എല്ലാം കൈവിട്ടുപോയി.

സംഭവം കണ്ട് ഭയന്നു പോയ കാമുകി ഉടന്‍ തന്നെ കാര്യം പോലീസിനെ അറിയിച്ചതാണ് പ്രശ്‌നമായത്. അദ്ദേഹത്തെ അവര്‍ പെട്ടെന്ന് ആശുപത്രിയില്‍ പ്രവേശിപ്പിക്കുകയും ചെയ്തു. സംഭവത്തെക്കുറിച്ച് പരിശോധിച്ച പോലീസിന് അസ്വാഭാവികത തോന്നി അദ്ദേഹത്തെ ചോദ്യം ചെയ്തു. അപ്പോഴാണ് കാര്യങ്ങളുടെ സത്യാവസ്ഥ ബോധ്യമായത്. അദ്ദേഹം നടന്നതെല്ലാം പോലീസിനോട് തുറന്നു പറഞ്ഞു.

അദ്ദേഹം ബോധപൂര്‍വ്വം നടത്തിയ നാടകമാണെന്ന് പൂര്‍ണമായി ബോധ്യപ്പെട്ട പോലീസ് അഞ്ഞൂറ് യുവാന്‍ ഇദ്ദേഹത്തില്‍ നിന്നും ഈടാക്കുകയും പത്ത് ദിവസത്തെ ജയില്‍ ശിക്ഷ വിധിക്കുകയും ചെയ്തു. എല്ലാം കള്ളത്തരമാണെന്ന് മനസിലായ കാമുകി അദ്ദേഹത്തെ ഉപേക്ഷിച്ചുവോ എന്ന് വ്യക്തമല്ല.