ബോസ്റ്റണ്‍ നഗരത്തില്‍ നിന്ന് മുപ്പതുമൈല്‍ മാറിയുള്ള ഹോപ്കിന്‍ടണ്‍ എന്ന ചെറുപട്ടണത്തില്‍ ഒരു 911 കോളിലൂടെ, തങ്ങളുടെ ലൊക്കാലിറ്റിയില്‍ ഉടുതുണിയില്ലാതെ ഒരു സ്ത്രീയും പുരുഷനും കൂടി പട്ടിയെ നടത്തിക്കാന്‍ പൊണ്ടുപോയിരിക്കുന്നു എന്ന പരാതിയെത്തിയത് മൂന്നാഴ്ച മുമ്പാണ്. രാവിലെ ആറരമണിയോടെയാണ്, ബോസ്റ്റണ്‍ പൊലീസിനെ തേടി ആ കോള്‍ എത്തിയത്.

ഉടനെത്തന്നെ ഒരു റെസ്‌പോണ്‍സ് ടീം സ്ഥലത്തെത്തി. മുപ്പത്തിരണ്ടുകാരിയായ മാരിയല്‍ കിന്നി, മുപ്പതുകാരനായ അവരുടെ ഭര്‍ത്താവ് കെവിന്‍ പിന്റോ, വളര്‍ത്തു പട്ടി ലൂസി, എന്നിവരെ പൊലീസ് തെരുവില്‍ വളഞ്ഞു പിടിച്ചു. ഇരുവര്‍ക്കും ദേഹത്ത് നൂല്‍ബന്ധമേതുമുണ്ടായിരുന്നില്ല.

നാട്ടുകാരുടെ മുന്നിലേക്ക് എന്തിനാണ് ഇങ്ങനെ തുണിയുടുക്കാതെ ഇറങ്ങിയിരിക്കുന്നത്? കുട്ടികള്‍ കാണില്ലേ? എന്നൊക്കെ പൊലീസ് തെല്ല് അരിശത്തോടു തന്നെ ദമ്പതികളോട് ചോദിച്ചു. എന്നാല്‍, ഈ ചോദ്യത്തോട് ഏറെ അക്രമാസക്തമായിട്ടാണ് അവര്‍ പ്രതികരിച്ചത്. പൊലീസിനോട് കോപിക്കുകയും  അസഭ്യങ്ങള്‍ പറയുകയും ചെയ്ത ശേഷം അവര്‍ ഓടി രക്ഷപ്പെടാനാണ് അടുത്തതായി ശ്രമിച്ചത്.

എന്നാല്‍, പിന്നാലെ പാഞ്ഞ പൊലീസ് തൊട്ടടുത്ത ലേനില്‍ വെച്ച് അവരെ വീണ്ടും വളഞ്ഞിട്ടു. പിന്നെ നടന്നത് തീപാറുന്ന സംഘട്ടനമായിരുന്നു. ആ ദമ്പതികള്‍ പൊലീസിനെ ശാരീരികമായി ആക്രമിച്ചു. ഏറെ പണിപ്പെട്ടാണ് പൊലീസ് ഇരുവരെയും പിടിച്ചു കെട്ടിയത്. സംഭവത്തിന് ശേഷം ഒരു പൊലീസ് ഓഫീസര്‍ക്ക് വൈദ്യസഹായവും നല്‍കേണ്ടി വന്നു. ഇരുവരെയും വിലങ്ങണിയിച്ച് ലോക്കപ്പില്‍ കയറ്റിയ പൊലീസ് അവര്‍ക്കുമേല്‍ നഗ്‌നതാ പ്രദര്‍ശനത്തിനും, അറസ്റ്റിനെ ചെറുത്തതിനും, പൊലീസിനെ ആക്രമിച്ചതും, ക്രമസമാധാനനില തകരാറിലാക്കിയതിനും ഒക്കെയുള്ള വകുപ്പുകള്‍ ചേര്‍ത്ത് കേസ് ചാര്‍ജ് ചെയ്തു.

വിഖ്യാതമായ ബോസ്റ്റണ്‍ മാരത്തോണിന്റെ സ്റ്റാര്‍ട്ടിങ് പോയിന്റ് ആയ ഹോപ്കിന്‍ടണ്‍, അമേരിക്കയിലെ തന്നെ ഏറ്റവും സുരക്ഷിതം എന്ന് റാങ്ക് ചെയ്യപ്പെട്ടിട്ടുള്ള പട്ടണങ്ങളില്‍ ഒന്നാണ്.