ഷൈന്‍ തോമസിന്റെ കടുംബത്തിന് കൊറോണയെ ഭയമില്ല!
ചുങ്കം മള്ളൂശേരി അംബ്രോസ് നഗറില്‍ മാത്തന്‍പറമ്പില്‍ ഷൈന്‍ തോമസിന്റെ കുടുംബത്തിന് കൊറോണയെ പേടിയില്ല. കാരണം കഴിഞ്ഞ 10 വര്‍ഷമായി ഇവരുടെ കുടുംബാംഗമാണ് കൊറോണ. കായംകുളം ചൂളത്തെരുവ് ജെ.ബാബുവിന്റെയും സെലിന്റെയും മകളായ ഈ കൊറോണ ഷൈന്‍ തോമസിന്റെ ഭാര്യയാണ്.
കൈക്കുഞ്ഞായിരുന്നപ്പോള്‍ മാമോദീസയ്ക്ക് ചൂളത്തെരുവ് സെന്റ് ജോസഫ്‌സ് പള്ളിയില്‍ കൊണ്ടു ചെന്നപ്പോള്‍ വികാരി ഫാ. ജയിംസ് ചടങ്ങിനു മുന്‍പ് ചോദിച്ചു: 'കുട്ടിക്ക് ഇടാന്‍ പേരെന്തെങ്കിലും മനസ്സിലുണ്ടോ? ഇല്ലെന്നു പറഞ്ഞതോടെ അദ്ദേഹം തന്നെ പേരിട്ടു. വീട്ടുകാര്‍ ഒരു വിളിപ്പേരുമിട്ടു.: 'ടിനു'.
സ്‌കൂളിലെ പേര് കൊറോണ എന്നാണ്. ഇനിഷ്യല്‍ ഇല്ല. കൂട്ടുകാര്‍ ചോദിച്ചപ്പോള്‍ ബൈബിളുമായി ബന്ധപ്പെട്ട പേരാണെന്നു പറയുമായിരുന്നു. 'കിരീടം' എന്നാണ് അര്‍ഥമെന്നും.
കായംകുളം ചൂളത്തെരുവ് സ്‌കൂളിലെ പഴയ കൂട്ടുകാര്‍ പലരും, ഇപ്പോള്‍ ആ പേര് ലോകപ്രശസ്തമായതോടെ വിളിക്കുന്നുണ്ട്. ഇംഗ്ലിഷില്‍ പേര് എഴുതുന്നതില്‍ വ്യത്യാസമുണ്ട്. Korona എന്നാണ് പേര് എഴുതുന്നത്.
10 വര്‍ഷം മുന്‍പായിരുന്നു കാരിച്ചാല്‍ ഹോളിഫാമിലി പള്ളിയില്‍ ഷൈനിന്റെയും കൊറോണയുടെയും വിവാഹം. ഇവര്‍ക്ക് 2 മക്കള്‍- വിദ്യാര്‍ഥികളായ കെവിന്‍, നവീന്‍. ഇതില്‍ കെവിന്‍ 'കൊറോണയമ്മ' എന്നാണ് വിളിക്കുന്നത്.
മത്സ്യത്തൊഴിലാളിയായ ഷൈനിന്റെ കൂട്ടുകാരായ സിങ്കല്‍ തന്മയ, പ്രദീപ് എമിലി എന്നിവര്‍ ചേര്‍ന്നു തയാറാക്കിയ വിഡിയോയിലൂടെയാണ് 'കൊറോണ' വിവരം നാടറിഞ്ഞത്.
https://www.facebook.com/Malayalivartha
