സ്വന്തം വീട്ടിന് തീയിട്ട് അതുകണ്ട് രസിക്കാന്‍ സാധിക്കുമോ? എന്നാല്‍ അങ്ങനെയും ചിലര്‍ ഈ ലോകത്തിലുണ്ട്. അത്തരമൊരു വാര്‍ത്തയാണ് അമേരിക്കയിലെ മേരിലാന്റില്‍ നിന്നും പുറത്ത് വരുന്നത്. അവിടെ ഒരു സ്ത്രീ സ്വന്തം വീടിന് തീ ഇട്ടശേഷം മാറിയിരുന്നു ആസ്വാദിക്കുകയാണ്. ഈ വീഡിയോ ഇന്ന് ലോകം മുഴവന്‍ വൈറലാകുകയാണ്. അയല്‍വാസി എവറി ഹല്‍മണ്ട് എന്നയാളാണ് സംഭവം വീഡിയോയില്‍ പകര്‍ത്തിയത്.

ഏപ്രില്‍ 29നാണ് സംഭവം ഉണ്ടായത് എന്നാണ് പ്രദേശിക മാധ്യമങ്ങളിലെ റിപ്പോര്‍ട്ട് ചെയ്തത്. സ്ത്രീയും മറ്റൊരാളും തമ്മില്‍ വീടിന്റെ മുന്നില്‍ തര്‍ക്കത്തിലേര്‍പ്പെടുന്നത് വീഡിയോയിലുണ്ട്. പിന്നീട് കാണുന്നത് വീടിനുള്ളില്‍ തീയിട്ട് മുറ്റത്ത് കസേരയിട്ട് ഒരു പുസ്തകവുമായി ശാന്തയായി ഇരിക്കുന്ന സ്ത്രീയെ ആണ്. പിന്നീട് ഇവര്‍ ഇവിടെനിന്നും സ്ഥലം കാലിയാക്കിയെങ്കിലും, എന്നാല്‍ അയല്‍വാസികള്‍ വിവരം അറിയിച്ചതിനെ തുടര്‍ന്ന് പോലീസ് ഇവരെ പിടികൂടി.

വലിയ രണ്ട് പൊട്ടിത്തെറികള്‍ വീട്ടില്‍ നിന്നും കേട്ടതായി അയല്‍വാസികള്‍ പറയുന്നു. വീടിന്റെ ബേസ്മെന്റില്‍നിന്നും മറ്റൊരു സ്ത്രീ സഹായത്തിന് നിലവിളിക്കുന്നത് കേട്ടതായും അയല്‍വാസികള്‍ പറയുന്നു. നിലവിളിച്ച സ്ത്രീയെ ഓടിയെത്തിയ അയല്‍വാസി രക്ഷപ്പെടുത്തി. 47കാരിയായ ഗെയില്‍ മെറ്റ്വാലിയാണ് സ്വന്തം വീട് തീയിട്ടതിന് പൊലീസ് പിടിയിലായത്. ഇവരടക്കം നാലു പേരാണ് വീട്ടില്‍ താമസിക്കുന്നതെന്നും സംഭവം നടക്കുമ്പോള്‍ രണ്ടു പേര്‍ സ്ഥലത്തില്ലായിരുന്നെന്നും പൊലീസ് പറഞ്ഞു.

സംഭവത്തിലേക്ക് നയിച്ചതിന്റെ കാരണമെന്താണ് എന്ന് ഇതുവരെ വ്യക്തമല്ല, പൊലീസ് അന്വേഷണം നടക്കുന്നുണ്ട്. തീവച്ച ഗെയില്‍ മെറ്റ്വാലിക്കെതിരെ കൊലപാതക ശ്രമം, തീവയ്പ്പ് അടക്കം വളരെ ഗൗരവമായ വകുപ്പുകള്‍ ചേര്‍ത്താണ് കേസ് എടുത്തിരിക്കുന്നത്.