സോഷ്യൽ മീഡിയയിൽ ഇന്ന് എല്ലാവരും വളരെ സജീവമായ ഒരു കാലഘട്ടമാണ്. എന്തിനും ഏതിനും നമ്മൾ സോഷ്യൽ മീഡിയയെ ആശ്രയിക്കുന്നവരാണ്. അന്നന്ന് കഴിച്ച ഭക്ഷണം ഏതെന്നുപോലും കൃത്യമായി പോസ്റ്റുകളുടെ രൂപത്തിൽ ഇടുന്ന പാർട്ടികളാണ് ഇന്നത്തെ ആളുകൾ.സമൂഹമാധ്യമങ്ങളിൽ വൈറലാകാൻ കുറച്ചുപേരും ഇതിന് പിന്നാലെയുണ്ട്.

അതിന് വേണ്ടി കുഞ്ഞുങ്ങളെയും വളർത്തുമൃഗങ്ങളെയുമൊക്കെ കൂട്ടുപിടിക്കുന്നവരാണ് ഭൂരിഭാ​ഗം പേരും. ഇത്തരത്തിൽ നിരവധി വീഡിയോകളാണ് സമൂഹമാധ്യമങ്ങളിലൂടെ പ്രചരിക്കുന്നത്. ഇപ്പോഴിതാ ഇങ്ങനെ പിന്നാലെ നടന്ന് വീഡിയോ എടുക്കുന്നതിന് ഒരച്ഛന് മകൻ കൊടുത്ത മറുപടിയുടെ വിഡിയോയാണ് വൈറലായി മാറിയിരിക്കുന്നത്.

തന്റെ ഇൻസ്റ്റാഗ്രാം പേജിലൂടെ 15,000 ൽ പരം ഫോളോവേഴ്സിനെ സമ്പാദിച്ച താരമാണ് മോലിക് ജയിൻ എന്ന ബാലൻ. കാർ യാത്രയ്ക്കിടെ കരിമ്പ് ജ്യൂസ് കുടിച്ചു കൊണ്ടിരിക്കുമ്പോഴാണ് മോലിക്കിനു നേരെ ഇത്തവണ അച്ഛൻ ക്യാമറ തിരിച്ചത്. എന്നാൽ ഏറെക്കാലമായി പ്രതികരിക്കാതെ കൂട്ടിവച്ചിരുന്ന ദേഷ്യമെല്ലാം അപ്പോൾ തന്നെ അച്ഛനോട് പറഞ്ഞു തീർക്കുകയാണ് വീഡിയോയിൽ മോലിക്.

ഇന്ന് ഓരോ കുട്ടിയും അനുഭവിക്കുന്ന പ്രശ്നം എന്ന തരത്തിലാണ് മോലിക്കിന്റെ പ്രതികരണം. എന്തു ചെയ്യുമ്പോഴും ക്യാമറയുമായി എത്തുന്നത് എന്തിനാണെന്നാണ് ചോദ്യം. ഈ ക്യാമറ ശല്യം കാരണം ഒന്നും ചെയ്യാനാവുന്നില്ല എന്നും പരാതിയുണ്ട്. ലോകത്തിലെ എല്ലാ കുട്ടികളുടെയും അച്ഛനമ്മമാർ മക്കളെ ഇൻഫ്ലുവൻസർമാരാക്കി മാറ്റാനുള്ള ശ്രമത്തിലാണെന്നും മോലിക് പറഞ്ഞുവയ്ക്കുന്നു.

ഇങ്ങനെ ദിവസവും വീഡിയോ എന്ന ചിന്ത മാത്രമായി പിന്നാലെ നടന്നാൽ ജീവിതം മുഴുവൻ ക്യാമറക്കുള്ളിൽ കുടുങ്ങിപോകുമെന്ന് വികാരഭരിതനായി പറയുകയാണ് കുട്ടി. ഒടുവിൽ മകന്റെ ദേഷ്യം ശമിപ്പിക്കാനായി ജ്യൂസ് കുടിക്കുകയാണോ എന്ന് അച്ഛൻ ചോദിച്ചതോടെ അതേയെന്നു പറഞ്ഞ് വീഡിയോ പകർത്തുന്നത് നിർത്താൻ ആവശ്യപ്പെടുകയും ചെയ്തു.