ലൈംഗികത്തൊഴിലാളികള്‍ പലരും തങ്ങളുടെ ശരീരം വില്‍ക്കുന്നത് ഇഷ്ടമുണ്ടായിട്ടല്ല. ജീവിതത്തിലെ പല സാഹചര്യങ്ങള്‍ കൊണ്ട് നിലനില്‍പ്പിനായി, ജീവിച്ചു പോകാനായി, ഒരു നേരത്തെ ആഹാരത്തിനായി അവര്‍ തങ്ങളുടെ ശരീരം വില്‍ക്കുന്നു. ഒരു ദിവസം പത്തും പതിനഞ്ചും കസ്റ്റമര്‍മാരെ അറ്റന്‍ഡ് ചെയ്യേണ്ടി വരുന്നവര്‍ വരെ ഉണ്ട്. 15 സ്വഭാവമുള്ളവര്‍, 15 വ്യത്യസ്ത ലൈംഗിക താല്പര്യം ഉള്ളവര്‍ , ഇവരുമൊത്തുള്ള ജീവിതം ഓരോ ലൈംഗിക തൊഴിലാളിക്കും നരക തുല്യമാണ്. ഓരോ ലൈംഗിക തൊഴിലാളിയുടേയും ഇത്തരം കഥകള്‍ ഇന്ന് എല്ലാവര്‍ക്കും കേട്ടുമടുത്ത കഥകളാണ്.

ലൈംഗിക തൊഴിലില്‍ ഏര്‍പ്പെട്ടിരിക്കവേ ഉണ്ടായ വ്യത്യസ്തമായ ഒരു അനുഭവം പങ്കുവയ്ക്കുകയാണ് മുംബൈ നഗരത്തില്‍ നിന്നുള്ള ബ്യൂട്ടി എന്ന യുവതി. പ്രശസ്ത ഡോക്യുമെന്ററി ഫോട്ടോഗ്രാഫര്‍ ജി എം ബി ആകാശിനോടാണ്് ബ്യൂട്ടി തന്റെ കഥ പറഞ്ഞത്. തന്റെ ഫേസ്ബുക്കിലൂടെ ആകാശ് അതു പങ്കുവയ്ക്കുന്നു.

ഒരു ശാസ്ത്രജ്ഞനായിരുന്ന ആ കസ്റ്റമറെ എല്ലാ ലൈംഗികതൊഴിലാളികള്‍ക്കും ഭയമായിരുന്നുവത്രേ.കാരണം അയാള്‍ അവിടെ എത്തി മണിക്കൂറുകള്‍ ചെലവിടും.ആ മണിക്കൂറുകള്‍ക്ക് കാശും കൊടുക്കും. എന്നാല്‍ അദ്ദേഹത്തോടൊപ്പം സമയം ചെലവിടാന്‍ പോകുന്ന ലൈംഗികതൊഴിലാളി നടത്തേണ്ടിയിരുന്നത് പഠനമായിരുന്നു. ഫിസിക്‌സ് , ബയോളജി, കെമിസ്ട്രി എന്നിവയൊക്കെ ആയിരുന്നു അദ്ദേഹം പഠിപ്പിക്കാന്‍ ശ്രമിച്ചിരുന്നതത്രേ. അതുകൊണ്ടായിരുന്നു എല്ലാവര്‍ക്കും അദ്ദേഹത്തെ ഭയമായിരുന്നത്.

ബ്യൂട്ടി പറയുന്നു; തന്നെയും ഫിസിക്‌സ് , ബയോളജി, കെമിസ്ട്രി എന്നിവ പഠിക്കാന്‍ അദ്ദേഹം നിര്‍ബന്ധിച്ചുകൊണ്ടിരുന്നു. ഈ വാക്കുകളില്‍ പലതും തനിക്ക് ഉച്ചരിക്കാന്‍ പോലും അറിയില്ലായിരുന്നു എന്നത് വേറെ കാര്യം. ചിലപ്പോള്‍ ഈ ലോകത്തില്‍ പഠിക്കുന്നതിനായി പണം നല്‍കപ്പെടുന്ന ഏക ലൈംഗികത്തൊഴിലാളി ഞാനായിരിക്കും, എങ്കിലും അദ്ദേഹത്തിനായി ഞാന്‍ പഠിച്ചു.

എന്നാല്‍ പിന്നീട് ഞാന്‍ അദ്ദേഹത്തോട് കൂടുതല്‍ അടുക്കുന്നു എന്നു തോന്നിയ അവസ്ഥയില്‍ ഞാന്‍ അദ്ദേഹത്തെ വിലക്കി. ആ പ്രൊഫസര്‍ക്ക് എന്നോടു പ്രണയം തോന്നി തുടങ്ങിയ ദിനം ഞാന്‍ പഠിത്തം നിര്‍ത്തി. എനിക്ക് എന്റെ കൂട്ടില്‍ ഒതുങ്ങുന്നതാണ് ഇഷ്ടം. ഒരിക്കലും പ്രണയത്തിന് അടിമപ്പെടരുത് എന്ന് സ്വയം വിലക്കി ഞാന്‍ തിരികെ നടന്നു''.ബ്യൂട്ടി പറഞ്ഞവസാനിപ്പിക്കുന്നു.മാംസനിബന്ധമല്ല രാഗം എന്നത് വലിയ സത്യം തന്നെയാണെന്നു നാം സമ്മതിച്ചുപോകും.