പലതരം കള്ളന്മാരെ നിങ്ങള്‍ കണ്ടിട്ടുണ്ടായിരിക്കാം.ഓടു പൊളിച്ച് ചില്ലറ മുതലിനായി വീടുകള്‍ തോറും കയറിയിറങ്ങുന്ന നാടന്‍ കള്ളന്മാര്‍ മുതല്‍ കൊള്ളയടി വീരന്മാര്‍ വരെ. സാധാരണ കള്ളനെ തേടി പൊലീസ് ഓടാറാണല്ലോ പതിവ്. എന്നാല്‍ വ്യത്യസ്തനായ ഒരു കള്ളന്റെ വിഡിയോ ആണ് ഇപ്പോള്‍ സമൂഹമാധ്യമത്തില്‍ വൈറലാകുന്നത്.

ഷെന്‍സെന്‍ സിറ്റിയില്‍ റോഡ് മുറിച്ചു കടക്കാനായി കാത്തുനിന്ന ഒരു യുവതിയുടെ മൊബൈല്‍ ഫോണ്‍ ആണ് കള്ളന്‍ അടിച്ചുമാറ്റി ഓടിക്കളഞ്ഞത്.കള്ളനെ വിടില്ലെന്ന ഭാവത്തോടെ പെണ്‍കുട്ടിയും പിന്നാലെ ഓടുന്നുണ്ടായിരുന്നു. വെപ്രാളത്തില്‍ ട്രാഫിക്കിലൂടെ ഓടിപ്പോകുന്നതിനിടെ കള്ളന്‍ നേരെചെന്നു കയറിയത് പൊലീസ് സ്‌റ്റേഷനിലേക്കായിരുന്നു. സംഭവത്തില്‍ ഇത്രവേഗമൊരു ട്വിസ്റ്റ് യുവതിയും പ്രതീക്ഷിച്ചിരിക്കില്ല.

പൊലീസ് സ്‌റ്റേഷനിലേക്ക് ഓടിക്കയറിയ യുവതി കാര്യങ്ങളെല്ലാം പറഞ്ഞതോടെ കള്ളന്റെ കാര്യം അധോഗതിയായി. ഇതോടെ കുറ്റം ചെയ്ത് വെറും പത്തു സെക്കന്റിനുള്ളില്‍ തന്നെ കള്ളന്‍ അകത്താവുകയും ചെയ്തു. സ്ഥലത്തെക്കുറിച്ച് വലിയ ധാരണയില്ലാത്ത യുവാവ് ആയതിനാലാകാം കക്ഷി വഴിതെറ്റി പൊലീസ് സ്‌റ്റേഷനിലേക്ക് ഓടിക്കയറിയതെന്നാണ് കരുതുന്നത്.