ലിയു യെലിന്റെ ചത്രങ്ങള്‍ വൈറല്‍ ആയതിന്റെ കാരണം അവര്‍ക്ക് തിളക്കമാര്‍ന്ന ചര്‍മവും അതിമനോഹരമായ ആകാരവടിവും ഉള്ളതു കൊണ്ടു മാത്രമായിരുന്നില്ല.ഒരു പുരുഷനോടൊപ്പം അവര്‍ നില്‍ക്കുന്ന ഒരു ചിത്രം കൂടി അതില്‍ ഉണ്ടായിരുന്നു. ആ ചിത്രത്തെ കുറിച്ചുള്ള വിവരങ്ങളാണ് അവരുടെ ചിത്രങ്ങളെ ശ്രദ്ധേയമാക്കിയത്. അത് അവരുടെ മകന്‍ ആണെന്നായിരുന്നു അവര്‍ പറഞ്ഞത്. ഇത്രയും പ്രായമുള്ള മകന്റെ അമ്മയാണ് അവര്‍ എന്ന് വിശ്വസിയ്ക്കാന്‍ ആരും തയ്യാറായില്ല.അപ്പോഴാണ് അവരുടെ അടുത്ത വെളിപ്പെടുത്തല്‍. ലിയുവിന് 50 വയസ്സുണ്ടത്രേ. ലിയുവിനെ കണ്ടാല്‍ അതിന്റെ പകുതി പ്രായമേ തോന്നുകയുള്ളൂ എന്നായിരുന്നു ഭൂരിപക്ഷം പേരുടെയും അഭിപ്രായം.

ഈ പ്രായത്തിലും തിളക്കമാര്‍ന്ന ചര്‍മ്മവും ആകാരവടിവും ശരീരസൗന്ദര്യവും നിലനിര്‍ത്താന്‍ കഴിയുന്ന, മധ്യചൈനയിലെ ഹെനാന്‍ പ്രവിശ്യയിലെ സിന്‍യാങ് പട്ടണവാസിയായ ലിയുവിന്്്്്്്് സോഷ്യല്‍മീഡിയയില്‍ ആരാധകരേറെയാണ്. ഷോപ്പിംഗിന് പോകുമ്പോള്‍ ആളുകളോട് യഥാര്‍ഥ പ്രായം വെളിപ്പെടുത്തേണ്ടി വന്നപ്പോഴൊക്കെ മിക്കവരും അത് വിശ്വസിക്കാന്‍ തയ്യാറായിട്ടില്ലെന്ന് ലിയു പറയുന്നു. തന്റെ യുവത്വത്തിന്റെ രഹസ്യം അറിയാന്‍ അപരിചിതര്‍ പോലും തനിക്ക് ചുറ്റും കൂടാറുണ്ടെന്നും അവര്‍ വ്യക്തമാക്കി.

എന്താണ് ലിയുവിന്റെ ശരീരസൗന്ദര്യത്തിന്റെ രഹസ്യമെന്നാണ് എല്ലാവര്‍ക്കും അറിയേണ്ടത്. മൂന്ന് ദശകങ്ങളായി തുടരുന്ന ദിവസേനയുള്ള വ്യായാമമാണ് തന്റെ ആരോഗ്യത്തിന്റെയും ശരീരസൗന്ദര്യത്തിന്റെയും കാരണമെന്ന് ലിയു വെളിപ്പെടുത്തുന്നു. 'എല്ലാ ദിവസവും തടാകത്തില്‍ നീന്താന്‍ പോകും. കൂടാതെ ഭാരോദ്വഹനവും സ്ഥിരമായി ചെയ്യാറുണ്ട്. വിന്ററില്‍ ഔട്ട്‌ഡോറില്‍ നീന്തുകയെന്നത് ഇഷ്ട വ്യായാമമാണ്', ലിയു പറഞ്ഞു. അതേസമയം സൗന്ദര്യവര്‍ധക വസ്തുക്കള്‍ യാതൊന്നും തന്നെ ഉപയോഗിക്കാറില്ലെന്നും ലിയു പറഞ്ഞു.

1985-ലാണ് ലിയു ആദ്യമായി ജോലിയില്‍ പ്രവേശിച്ചത്. അന്ന് അവര്‍ക്ക് പ്രായം 17. മൂന്ന് ദശാബ്ദങ്ങള്‍ക്ക് ശേഷം ലൈബ്രേറിയനായി പിരിയുമ്പോഴും കാഴ്ചയില്‍ ലിയു 17-കാരി തന്നെയാണെന്ന് അവരെ അറിയാവുന്നവര്‍ പറയുന്നു. മധ്യചൈനയിലെ ഹെനാന്‍ പ്രവിശ്യയിലെ സിന്‍യാന്‍ഗില്‍ 1968-ലാണ് ലിയു ജനിച്ചത്.

നല്ലൊരു നീന്തല്‍ക്കാരിയായ ലിയു ചൈനയിലെ യാങ്സീ നദിയിലും ദക്ഷിണകൊറിയയിലെ ഹാന്‍ നദിയിലും നീന്തിയിട്ടുണ്ട്. 2016 മാര്‍ച്ചില്‍ ഇവര്‍ മലാക്ക സ്‌ട്രെയിറ്റ് നീന്തികടന്ന് കടലില്‍ നീന്താനുള്ള ധൈര്യവും പ്രകടിപ്പിച്ചിരുന്നു. ഇതിന് പുറമെ ചോപ്പി ചാനലിലെ 12 കിലോമീറ്റര്‍ ദൂരം നാല് മണിക്കൂര്‍ നോണ്‍സ്‌റ്റോപ്പായി നീന്തികടക്കാനും ഇവര്‍ ധൈര്യം പ്രകടിപ്പിച്ചിരുന്നു.

ഇങ്ങനെയൊക്കെയാണെങ്കിലും പ്രായക്കുറവ് തനിക്ക് ചിലപ്പോഴൊക്കെ ഒരു തലവേദനയായി മാറിയിട്ടുണ്ടെന്നും ലിയു പറയുന്നു. ഒരിക്കല്‍ ഒരു വിവാഹത്തിന് പങ്കെടുക്കാന്‍ മകനൊപ്പം പോയപ്പോള്‍ അവിടെയുള്ളവര്‍ കരുതിയത് അത് തന്റെ പുതിയ ബോയ് ഫ്രണ്ടാണെന്നാണ്. ഒരു ഫിലിം പ്രൊഡക്ഷന്‍ കമ്പനിയില്‍ അസിസ്റ്റന്റായി ജോലി ചെയ്യുകയാണ് മകന്‍.