തനിക്കൊപ്പം നൃത്തം ചെയ്യാന്‍ വിസമ്മതിച്ച ഭാര്യയെ വീടിന്റെ മുകള്‍നിലയില്‍ നിന്ന് തള്ളിയിട്ട് യുവാവിന്റെ പ്രതികാരം. കാണ്‍പൂരിലെ ചില്ലഘട്ടില്‍ ശനിയാഴ്ച രാത്രിയാണ് സംഭവം. രണ്ടു കാലുകളും ഒടിയുകയും കൈകള്‍ക്കും വയറിനും ഗുരുതരമായി പരുക്കേല്‍ക്കുകയും ചെയ്ത യുവതി ഇപ്പോള്‍ തീവ്രപരിചരണ വിഭാഗത്തില്‍ ചികിത്സയിലാണ്. 

ഒരു ബന്ധുവിന്റെ വിവാഹ ചടങ്ങിനിടെ മദ്യപിച്ച് ലക്കുകെട്ട ഭര്‍ത്താവ് അജയ് ഭാര്യ വിശ്വക തിവാരി (28)നെ തനിക്കൊപ്പം നൃത്തം ചെയ്യാന്‍ ക്ഷണിച്ചു. എന്നാല്‍ വിശ്വക ഇത് നിരസിച്ചു. ഇതോടെ കുപിതനായ അജയ് ഭാര്യയെ ആഘോഷം നടന്നിരുന്ന വീടിന്റെ റൂഫ്‌ടോപ്പില്‍ നിന്ന് തള്ളി താഴെയിടുകയായിരുന്നു. അജയ്‌ക്കെതിരെ കേസെടുത്തതായും വിശ്വകയുടെ മൊഴി രേഖപ്പെടുത്തിയെന്നും പോലീസ് അറിയിച്ചു.