രാജേന്ദ്ര മൈതാനിയില്‍ നടക്കുന്ന ചക്ക-മാങ്ങ-തേങ്ങ ഫെസ്റ്റിനോടനുബന്ധിച്ചാണു വീട്ടമ്മമാര്‍ക്കായി തേങ്ങ ചിരകല്‍ മത്സരം സംഘടിപ്പിച്ചത്. ഇരുപതോളം വീട്ടമ്മമാരാണു പങ്കെടുക്കാനെത്തിയത്.

എന്നോടാണോ കളിയെന്നു തേങ്ങയും ചിരവയും പരസ്പരം പോരടിച്ചതോടെ തേങ്ങ ചിരകല്‍ മത്സരത്തിന് ആവേശമായി. ചിരവപ്പുറത്ത് അമര്‍ന്നിരുന്നു വീട്ടമ്മമാരും കളി തങ്ങളോടു വേണ്ടെന്നു പ്രഖ്യാപിച്ചതോടെ മത്സരം മുറുകി.

വ്യത്യസ്തമായ മത്സരം കാണാന്‍ കാഴ്ചക്കാരും കയ്യടിയുമായി തടിച്ചുകൂടി. അഞ്ചു മിനിറ്റിനുള്ളില്‍ ആറു തേങ്ങ പൂര്‍ണമായി ചിരകിയ മുനമ്പം സ്വദേശിനി ജെസി പുഷ്പ ഒന്നാംസ്ഥാനം നേടി.

അഞ്ചു തേങ്ങ ചിരകി ആലപ്പുഴ സ്വദേശിനി വിജി രണ്ടാം സ്ഥാനത്തെത്തി. വീട്ടമ്മമാരുടെ മത്സരത്തില്‍ നിന്ന് ആവേശം ഉള്‍ക്കൊണ്ടു തനിക്കും മത്സരിക്കണമെന്ന ആഗ്രഹവുമായി എത്തിയ കൊല്ലം പള്ളിമുക്ക് സ്വദേശി ഷിഹാബിനും സംഘാടകര്‍ അവസരം നല്‍കി.

വീട്ടമ്മമാര്‍ക്കൊപ്പം വാശിയോടെ മത്സരിച്ച ഷിഹാബ് ജെസി പുഷ്പയ്‌ക്കൊപ്പം ഒന്നാം സ്ഥാനം പങ്കിട്ടു. നാളെ വൈകിട്ടു നാലിനു മാമ്പഴത്തീറ്റ മത്സരം സംഘടിപ്പിച്ചിട്ടുണ്ട്. ഒമ്പതു വയസ് മുതല്‍ 16 വയസ് വരെയും അതിനു മുകളില്‍ പ്രായമുള്ളവരെയും രണ്ടു വിഭാഗമായി തിരിച്ചാണു മത്സരം. പത്ത് മിനിറ്റിനുള്ളില്‍ ഏറ്റവും കൂടുതല്‍ മാമ്പഴം കഴിക്കുന്നവര്‍ക്കു സമ്മാനം ലഭിക്കും.

ഞായറാഴ്ച വൈകിട്ടു നാലിനു പാചക മത്സരം സംഘടിപ്പിച്ചിട്ടുണ്ട്. ചക്ക കൊണ്ടുണ്ടാക്കിയ വിഭവങ്ങള്‍ ആണു പാചകം ചെയ്യേണ്ടത്. വീട്ടില്‍ നിന്നു പാചകം ചെയ്ത ചക്ക വിഭവങ്ങള്‍ രാജേന്ദ്രമൈതാനിയിലെ വേദിയില്‍ പ്രദര്‍ശിപ്പിക്കും. മത്സരത്തില്‍ പങ്കെടുക്കുന്നതിനായി 9746338590, 8138846916 എന്നീ നമ്പറുകളില്‍ പേര് റജിസ്റ്റര്‍ ചെയ്യണം.

ചക്ക സദ്യ, ചക്ക മസാലദോശ, ചക്കപ്പുട്ട്, ചക്ക വരട്ടി, ചക്കപ്പുഴുക്ക്, ചക്കയപ്പം, ചക്കപ്പായസം, ചക്ക സര്‍ബത്ത്, ചക്ക ഐസ്‌ക്രീം, ചക്കച്ചിപ്‌സ് തുടങ്ങി മുന്നൂറോളം ചക്ക വിഭവങ്ങളും തേങ്ങച്ചിപ്‌സ്, തേങ്ങപ്പായസം, തേങ്ങപ്പത്തിരി, തേങ്ങ ബജി തുടങ്ങിയ തേങ്ങ വിഭവങ്ങളും പ്രദര്‍ശനത്തിനും വില്‍പനയ്ക്കും തയാറാക്കിയിട്ടുണ്ട്. ചക്ക, മാങ്ങ, തേങ്ങ ഐസ്‌ക്രീം ആണ് ഇത്തവണ മേളയുടെ പ്രധാന ആകര്‍ഷണമെന്നു സംഘാടകനായ ഷമീര്‍ വളവത്ത് പറഞ്ഞു. മെയ് 22 വരെ മേള നീളും.