കടലിടുക്കില്‍ രണ്ടു പാറയില്‍ ബന്ധിപ്പിച്ച വടത്തില്‍ കൂടി സഞ്ചരിക്കാന്‍ ശ്രമിക്കുന്ന യുവതിക്കുമേല്‍ തിരമാല അടിച്ചു കയറുന്ന വീഡിയോ വൈറലാകുന്നു.

ഇന്ത്യന്‍ മഹാസമുദ്രത്തിലെ റീയുണിയന്‍ ഐലന്‍ഡിലാണ് ഏവരേയും ഞെട്ടിക്കുന്ന രംഗങ്ങള്‍ അരങ്ങേറിയത്. കൊരാളി ജിറാള്‍ട്ട് എന്ന യുവതിയാണ് സാഹസികമായി പാറക്കെട്ടിലേക്ക് കടക്കാന്‍ ശ്രമിച്ചത്.

എന്നാല്‍ വടത്തിന്റെ നടുഭാഗത്തെത്തിയപ്പോള്‍ 40 അടി ഉയരത്തില്‍ ഒരു കൂറ്റന്‍ തിര ഇവരെ മൂടുകയായിരുന്നു. വടവുമായി ഇവരെ ബന്ധിപ്പിച്ചിരുന്നതിനാല്‍ ഇവര്‍ സമുദ്രത്തിലേക്കു വീഴാതെ രക്ഷപെടുകയായിരുന്നു.

വീണ്ടും ശക്തമായ തിരമാല പാറയിടുക്കിലേക്ക് അടിച്ചു കയറുന്നത് ദൃശ്യങ്ങളില്‍ കാണാം. ഒപ്പമുണ്ടായിരുന്നവര്‍ കാമറയില്‍ പകര്‍ത്തിയ ദൃശ്യങ്ങള്‍ സാമൂഹ്യ മാധ്യമങ്ങളില്‍ പോസ്റ്റ് ചെയ്തതിനെ തുടര്‍ന്ന് വൈറലാകുകയായിരുന്നു.