ഇംഗ്ലണ്ടില്‍ റിസപ്ഷനിസ്റ്റായി ജോലി ചെയ്യുന്ന നതാലി വീവര്‍ ഞായറാഴ്ച ദിവസം കാമുകന്‍ സ്റ്റീഫന്‍ ഹാളുമൊത്ത് പുറത്ത് കറങ്ങാന്‍ പോകണമെന്നായിരുന്നു പ്ലാന്‍ ചെയ്തത്. എന്നാല്‍ സ്റ്റീഫന്‍ എത്തിയതു തന്നെ വെളുപ്പിന് 6 മണിക്കായിരുന്നു. അതും മദ്യപിച്ചു വെളിവില്ലാതെ.

നേരെചൊവ്വേ ഒന്നു നിവര്‍ന്നു നില്‍ക്കാന്‍ പോലുമാകാത്ത നിലയില്‍ നില്‍ക്കുന്ന അയാളെയും കൊണ്ട് അന്നു പുറത്തുപോയിട്ട് ഒരു കാര്യവുമില്ലെന്ന് നതാലിയ്ക്കു മനസ്സിലായി. ആകെ നിരാശയായി.എങ്കിലും നതാലി അപ്പോള്‍ ഒന്നും പറഞ്ഞില്ല.സ്റ്റീഫന്‍ ഒന്നു വിശ്രമിച്ചു കഴിയുമ്പോഴേയ്ക്കും വ്യത്യാസം വരുമെന്നു കരുതി. ഉച്ചയ്ക്ക് ഒരു മണിയോടെ അയാള്‍ വീണ്ടും ഉറങ്ങാന്‍ കിടന്നു.

ഒരുമണിക്കൂര്‍ കഴിഞ്ഞ് ഉണര്‍ന്ന് പുറത്തുപോകാന്‍ റെഡിയായി. എന്നാല്‍ കണ്ണൊന്നു തുറന്നു പിടിയ്ക്കാന്‍ പോലുമാകാതെ അയാള്‍ കഷ്ടപ്പെട്ടു.വല്ലവിധേനെയും തിരിച്ചുവീട്ടിലെത്തിയാല്‍ മതിയെന്നായിരുന്നു നതാഷയ്ക്ക്. മുന്‍കൂട്ടി പ്ലാന്‍ചെയ്ത ഔട്ടിംഗ് ഇങ്ങനെ നശിപ്പിച്ചു കളഞ്ഞ സ്റ്റീഫനെ വെറുതെ വിടരുതെന്ന് അവള്‍ ഉറപ്പിച്ചു.

വീട്ടിലെത്തിയ ഉടനെ വീണ്ടും കിടന്ന് ഉറക്കമാരംഭിച്ച കാമുകനെ മേക്കപ്പ് ചെയ്ത് അവള്‍ സ്ത്രീരൂപത്തിലാക്കി മാറ്റി. പിന്നീട് കാമുകന്‍ ഉണര്‍ന്നത്, അയാളുടെ കൈയ്യില്‍ അവള്‍ പിടിപ്പിച്ചു വച്ച കൃത്രിമ നഖങ്ങള്‍ കൊണ്ട് ഉറക്കത്തിനിടയില്‍ ചൊറിഞ്ഞപ്പോള്‍ ഉണ്ടായ വേദന കൊണ്ടായിരുന്നു. എഴുന്നേറ്റ് കണ്ണാടിയില്‍ നോക്കിയപ്പോള്‍ അയാള്‍ ശരിക്കും ഞെട്ടിപ്പോയി. എന്താണ് സംഭവിച്ചതെന്ന് ചോദിച്ചപ്പോള്‍ നീ വീട്ടിലേക്ക് വന്നത് ഇങ്ങനെയായിരുന്നെന്ന് നതാലി സ്റ്റീഫനോട് പറഞ്ഞു.

ആദ്യത്തെ ഞെട്ടല്‍ മാറിയപ്പോള്‍ നതാലി സംഭവിച്ചത് പറഞ്ഞു. സത്യമറിഞ്ഞ സ്റ്റീഫന്‍ ദേഷ്യപ്പെട്ടില്ലെന്ന് മാത്രമല്ല ചിരി നിര്‍ത്താന്‍ പാടുപെടുകയും ചെയ്‌തെന്നാണ് നതാലി പറയുന്നത്. എന്തായാലും ഇനി ഒരിക്കലും നതാലിക്ക് കൊടുത്ത വാക്ക് സ്റ്റീഫന്‍ തെറ്റിക്കില്ലെന്ന വിശ്വാസത്തിലാണ് നതാലി.