ഒരു കുഞ്ഞു കുട്ടിയുടെ മാതാപിതാക്കള്‍ക്ക് ഒരു കുസൃതി തോന്നി. ജനിച്ചപ്പോള്‍ മുതല്‍ അവള്‍ കണ്ട് പരിചിതമായി കഴിഞ്ഞിരുന്ന അവളുടെ ഡാഡിയുടെ മുഖം ഒന്ന് മാറ്റി അവതരിപ്പിച്ചാല്‍ എന്തായിരിക്കും ആ കുഞ്ഞുമനസ്സിലെ ചിന്തകളും അതിനോടുള്ള പ്രതികരണവും എന്നറിയാന്‍ ശ്രമിക്കണമെന്ന്!

അതിനായി അവര്‍ ഉപയോഗപ്പെടുത്തിയത് ആ ഡാഡിയും മകളുമായി എപ്പോഴും കളിക്കുന്ന ഒരു കുട്ടിക്കളിയും. മുഖം മറച്ചിരിക്കുന്ന ഡാഡിയുടെ മുഖത്തെ തുണി വലിച്ചു നീക്കിക്കളഞ്ഞ് തന്റെ ഡാഡി ഇതാ ഇവിടുണ്ടെന്ന് കണ്ടുപിടിച്ചത് സന്തോഷത്തോടെ ആഘോഷിക്കുന്ന അവളുടെ ആഹഌദം കണ്ടിരിക്കാന്‍ അതിമനോഹരം തന്നെ.

അന്നും അവളുടെ ഡാഡി കളിക്കാനെത്തി. മുഖത്തെ താടിരോമങ്ങള്‍ എല്ലാം നീക്കം ചെയ്തതിനു ശേഷമാണ് അന്ന് അയാള്‍ കളിക്കാനെത്തിയത്. മുഖത്ത് തുണി ഇട്ടുകൊണ്ട് എന്നത്തേയും പോലെ അയാള്‍ കുഞ്ഞിനെ വിളിച്ചു.

മുഖം തുണി കൊണ്ട് മറച്ചിരിക്കയാണെങ്കിലും അതിനുള്ളില്‍ കൂടി അവളുടെ ഡാഡി വിളിക്കുമ്പോള്‍ തന്റെ ഡാഡിയുടെ ശബ്ദം അവള്‍ തിരിച്ചറിയുന്നുണ്ട്. ഡാഡി പതിവു കളിക്കെത്തിയിരിക്കയാണെന്ന സന്തോഷത്തോടെ ദീപ്തമായ കണ്ണുകളോടെ അവള്‍ ഡാഡിയുടെ മടിയില്‍ ഇരുന്നുകൊണ്ട് മുഖത്തെ തുണി വലിച്ചുമാറ്റുന്നു.

എന്നാല്‍ പതിവായി അവള്‍ കാണുന്ന ഡാഡിയുടെ മുഖമായിരുന്നില്ല അവള്‍ കണ്ടത്. താടിയുള്ള ഡാഡി ആയിരുന്നല്ലോ എന്റേത്...ഇതിപ്പോള്‍ എങ്ങനെ താടിയില്ലാത്ത ആളായി...ഡാഡിയുടെ ശബ്ദം തന്നെയായിരുന്നുവല്ലോ മുഖം മൂടിയിരുന്ന തുണിക്കുള്ളിലൂടെ ഞാന്‍ കേട്ടത്...എന്നിങ്ങനെയൊക്കെയുള്ള ആശയക്കുഴപ്പങ്ങള്‍ ആ കുഞ്ഞുമനസ്സിലൂടെ കടന്നു പോകുന്നത് പെട്ടെന്നു തന്നെ ആര്‍ക്കും മനസ്സിലാകും. അധികസമയം അവള്‍ക്ക് പിടിച്ചുനില്‍ക്കാനായില്ല. തന്റെ ഡാഡിക്ക് 'ഗുരുതരമായ എന്തോ സംഭവിച്ചിരിക്കുന്നു' വെന്ന തിരിച്ചറിവില്‍ അവള്‍ പൊട്ടിക്കരഞ്ഞുപോയി.

മാതാപിതാക്കളുടെ ചെറിയ മാറ്റം പോലും കുഞ്ഞുങ്ങള്‍ ശ്രദ്ധിക്കും പ്രത്യേകിച്ച് അവര്‍ക്ക് അത് ഇഷ്ടപ്പെട്ടില്ലെങ്കില്‍. അത്തരത്തില്‍ ഒരു കൗതുകരമായ വീഡിയോയാണ് സോഷില്‍ മീഡിയയില്‍ ഇപ്പോള്‍ വൈറലായിരിക്കുന്നത്. താടിയുള്ളപ്പോഴും താടി വടിച്ചതിനു ശേഷവുമുള്ള അച്ഛനെ കണ്ട കുഞ്ഞിന്റെ മുഖത്ത് ഉണ്ടായ ഭാവപ്രകടനങ്ങളാണ് വീഡിയോയില്‍. എന്തായാലും രസകരമായ ആ വീഡിയോ ആളുകള്‍ ഏറ്റെടുത്തു കഴിഞ്ഞു.