കാലിഫോര്‍ണിയയിലെ അല്‍റ്റാഡിനയിലെ ഒരു വീട്ടുകാരി തന്റെ പറമ്പില്‍ നടക്കുന്നതായി താന്‍ കണ്ടുകൊണ്ടിരിക്കുന്ന കാഴ്ചകള്‍ സത്യമാണോ അതോ സ്വപ്‌നമാണോ എന്നു എങ്ങനെ തിരിച്ചറിയും എന്ന വേവലാതിയില്‍ ആയിപ്പോയി. തന്റെ പറമ്പില്‍ ഒരു അമ്മക്കരടിയേയും അതിന്റെ കുഞ്ഞിനേയുമാണ് അവര്‍ കണ്ടത്.

അവ മതില്‍ ചാടിക്കടന്ന് പറമ്പില്‍ നിന്ന് പുറത്തുപോകാനായി ശ്രമം നടത്തുകയാണ്. എങ്ങനെ അവ അവിടെ എത്തിപ്പറ്റി എന്നവര്‍ക്കു മനസ്സിലായില്ല. എങ്കിലും ഓടിപ്പോയി അവര്‍ തന്റെ ഐപോഡ് എടുത്തുകൊണ്ട് വന്ന് അവയുടെ ചെയ്തികളെല്ലാം റെക്കാര്‍ഡു ചെയ്യാന്‍ തുടങ്ങി.

അമ്മക്കരടിയ്ക്ക് വളരെ പെട്ടെന്നു തന്നെ മതില്‍ ചാടിക്കടക്കാന്‍ കഴിഞ്ഞു.എന്നാല്‍ കരടിക്കുഞ്ഞിന് ആ മതിലിനു മുകളിലേയ്ക്ക് ചാടിക്കയറാന്‍ കഴിയുന്നില്ല.

കരടിക്കുഞ്ഞ് കയറി വരുന്നതും കാത്ത് മതിലിനു മുകളില്‍ നില്‍ക്കുന്ന അമ്മക്കരടി താഴെ നില്‍ക്കുന്ന കുട്ടിക്കരടിയെ മുകളിലേക്ക് കയറ്റുവാന്‍ ശ്രമിക്കുന്നുണ്ട്. താഴെ നില്‍ക്കുന്ന കുട്ടിക്കരടി തന്നെയും കൊണ്ടു പോകു എന്നയര്‍ഥത്തില്‍ ഇരുകൈകളും അമ്മയ്ക്കു നേരെ മുകളിലേക്ക് ഉയര്‍ത്തി നില്‍ക്കുന്നതും കാണാന്‍ കഴിയുന്നുണ്ട്.

എന്നാല്‍ അല്‍പ്പസമയം കൂടി ശ്രമിച്ചിട്ട് കൂഞ്ഞിനെ അതിന്റെ വിധിക്കു വിട്ടിട്ട് തന്റെ ശ്രമം ഉപേക്ഷിച്ച് അമ്മ മടങ്ങുകയാണ് ചെയ്യുന്നത്. മനുഷ്യവാസമുള്ളിടത്തു നിന്നും ആരെങ്കിലും എത്തുന്നതിനു മുമ്പേ സ്വന്തം ജീവന്‍ സുരക്ഷിതമാക്കാം എന്ന ചിന്തയായിരിക്കാം ആ അമ്മക്കരടിയെ മടങ്ങാന്‍ പ്രേരിപ്പിച്ചത്.

അതോ മനുഷ്യര്‍ക്ക് കരടിയെ പേടിയാണെന്ന വിവരം കരടിയ്ക്ക് അറിയില്ലായിരുന്നുവോ ആവോ? ആളുകള്‍ എത്തിയിരുന്നെങ്കില്‍ പോലും കരടിക്കുഞ്ഞിനൊപ്പം അമ്മക്കരടിയെ കണ്ടിരുന്നെങ്കില്‍ രണ്ടുപേര്‍ക്കും രക്ഷപ്പെടാന്‍ വഴിയൊരുങ്ങുമായിരുന്നേനെ. എന്നാലും സ്വന്തം കുഞ്ഞിനെ ഉപേക്ഷിച്ചു കടന്നുകളഞ്ഞത് അത്ര ശരിയായില്ല!