ഒരു അമ്യൂസ്‌മെന്റ് പാര്‍ക്കിലെ റൈഡില്‍ കറങ്ങുന്നതിനിടെ പിടിവിട്ട പെണ്‍കുട്ടി വീണത് 25 അടി താഴേക്ക്. എന്നാല്‍ പെണ്‍കുട്ടി വീഴുന്നത് കണ്ട് പാര്‍ക്കിലുണ്ടായിരുന്ന ആളുകള്‍ ഓടിക്കൂടുകയും അവളെ കൈകളില്‍ പിടിച്ചെടുക്കാന്‍ ശ്രമിക്കുകയും ചെയ്തു. നിസാര പരിക്കുകളോടെ പെണ്‍കുട്ടി രക്ഷപ്പെട്ടുവെന്നാണ് റിപ്പോര്‍ട്ട്. പാര്‍ക്കിലുണ്ടായിരുന്ന ഒരാളാണ് ഈ ദൃശ്യം പകര്‍ത്തിയത്. ഫേസ്ബുക്കില്‍ പ്രചരിക്കുന്ന ഈ പോസ്റ്റിന് വലിയ പ്രതികരണമാണ് ലഭിച്ചത്.

ശനിയാഴ്ച വൈകിട്ട് ന്യൂയോര്‍ക്കിലെ ലേക്ക് ജോര്‍ജിലുള്ള സിക്‌സ് ഫഌഗ്‌സ് ഗ്രേറ്റ് എസ്‌കേപ്പ് പാര്‍ക്കിലാണ് സംഭവം. നീല ഷോര്‍ട്‌സും ചാരനിറയുള്ള ഷര്‍ട്ടുമിട്ട പെണ്‍കുട്ടി റൈഡിലെ സീറ്റില്‍ നിന്നും തൂങ്ങിക്കിടന്ന് നിലവിളിക്കുന്നത് കേട്ടാണ് ജനങ്ങളുടെ ശ്രദ്ധ തിരിഞ്ഞത്. സീറ്റിലുണ്ടായിരുന്ന മറ്റൊരാള്‍ സുരക്ഷിതനായി ഇരിക്കുകയായിരുന്നു.

പെണ്‍കുട്ടിയെ രക്ഷിക്കാന്‍ പാര്‍ക്കിലുണ്ടായിരുന്നവര്‍ എല്ലാം റൈഡിന്റെ താഴത്തെത്തി കൈകള്‍ കോര്‍ത്തുപിടിച്ചുനിന്നു. മറ്റൊരാള്‍ റൈഡ് കുടുങ്ങിക്കിടക്കുന്ന മരത്തില്‍ കയറി അത് മോചിപ്പിച്ചു. ധൈര്യമായി താഴെയ്ക്ക് പോരെ, നിന്നെ ഞങ്ങള്‍ പിടിച്ചുകൊള്ളാമെന്ന് ജനം വിളിച്ചുപറയുന്നുമുണ്ടായിരുന്നു.

ഗ്രീന്‍വുഡ് സ്വദേശിനിയായ 14-കാരിക്കാണ് ഈ അപകടം പിണഞ്ഞത്. ചാഴേക്ക് ചാടിയ പെണ്‍കുട്ടിയെ ജനക്കൂട്ടം കൈകളില്‍ പിടിച്ചെടുത്തു. പാര്‍ക്കിലെ മെഡിക്കല്‍ സംഘം പരിശോധിച്ച ശേഷം ആശുപത്രിയിലേക്ക് മാറ്റിയ അവളെ പിന്നീട് ഹെലികോപ്ടറില്‍ ആല്‍ബനിയിലെ മെഡിക്കല്‍ സെന്ററിലേക്ക് കൊണ്ടുപോയി.

പെണ്‍കുട്ടിയെ പിടിക്കാന്‍ ശ്രമിക്കുന്നതിനിടെ നടുവ് വിലങ്ങിയ ഒരു 47-കാരനെയും ആശുപത്രിയില്‍ പ്രവേശിപ്പിച്ചു.