ടിവിയില്‍ പഞ്ചഗുസ്തി മത്സരത്തിനിടെ ഒരു മല്‍സരാര്‍ത്ഥി എതിരാളിയുടെ കൈ തകര്‍ക്കുന്ന ദൃശ്യം കണ്ട് പ്രേക്ഷകര്‍ നടുങ്ങി. അര്‍ജന്റീന ടെലിവിഷനിലാണ് കൈയൊടിക്കുന്ന ദൃശ്യം തത്സമയം സംപ്രേഷണം ചെയ്തത്. അയണ്‍ ലേഡി എന്ന റിയാലിറ്റി ഷോയുടെ ഭാഗമായി നടന്ന പഞ്ചഗുസ്തിക്കിടെയാണ് സംഭവം. കൈയൊടിഞ്ഞ പമേലയെന്ന യുവതിക്ക് ഇനി ശസ്ത്രക്രിയ വേണം.

ശക്തിപരീക്ഷിക്കാന്‍ ഇരുമത്സരാര്‍ത്ഥികളും സമ്മതിച്ചതിനുശേഷമാണ് പഞ്ചഗുസ്തിയിലേര്‍പ്പെട്ടത്. പെട്ടെന്നെന്തോ ഒടിയുന്ന ശബ്ദം കേട്ടു. ഉടനെതന്നെ പമേലയുടെ എതിരാളിക്ക് കാര്യം മനസ്സിലാവുകയും അവര്‍ മെഡിക്കല്‍ സംഘത്തെ വിളിച്ചുവരുത്തുകയുമായിരുന്നു. നടന്നതെന്തെന്ന് അവതാരകന്‍ വിശദീകരിക്കുമ്പാള്‍ സംഭ്രമത്തോടെ അതെല്ലാം കേട്ടുകൊണ്ട് ഈ മത്സരാര്‍ഥി നില്‍ക്കുന്നതും കാണാമായിരുന്നു.

എല്ല് കുഴതെറ്റിയതാണെന്നാണ് ആദ്യം കരുതിയത്. എന്നാല്‍, എല്ല് പൊട്ടിയിട്ടുണ്ടെന്ന് പരിശോധനയില്‍ വ്യക്തമായി. ഇതേത്തുടര്‍ന്നാണ് ശസ്ത്രക്രിയ വേണമെന്ന് ഡോക്ടര്‍മാര്‍ തീരുമാനിച്ചത്. കൈ വലിച്ചൊടിച്ച എതിരാളി ഷോയില്‍നിന്ന് പോകണമെന്ന് ആവശ്യപ്പെട്ടെങ്കിലും, അവതാരകനായ ചിനോ ല്യൂനിസ്, മുഴുവന്‍ കാര്യങ്ങളും വിശദീകരിക്കുന്നതുവരെ അവരുടെ സാന്നിധ്യം ആവശ്യപ്പെടുകയായിരുന്നു.

നാല് മത്സരാര്‍ഥികളാണ് പരിപാടിയിലുണ്ടായിരുന്നത്. ശാരീരികാഭ്യാസത്തിനൊപ്പം ബുദ്ധിപരിശോധിക്കുന്ന പരീക്ഷണങ്ങളുമുണ്ടായിരുന്നു. ലൈവ് ടിവി നടത്തുന്ന റിയാലിറ്റി ഷോയില്‍ വിജയിക്കുന്നവര്‍ക്ക് ക്യാഷ് അവാര്‍ഡിന് പുറമെ, പുതിയ കാറും ലഭിക്കും. വാട്ട് ഹാന്‍ഡ് ഈസ് ഇറ്റ് ഇന്‍ എന്ന പരിപാടിക്ക് അര്‍ജന്റീനയില്‍ വലിയ ജനപ്രീതിയാണുള്ളത്.