മനുഷ്യന്‍ അവന്റെ ഭൗതിക നേട്ടങ്ങള്‍ സൂക്ഷിച്ച് വയ്ക്കാന്‍ തുടങ്ങിയ കാലം മുതലേ കള്ളന്മാരുമുണ്ട്. എന്നാല്‍ സിസിടിവി ക്യാമറ വ്യാപകമായി ഉപയോഗിച്ച് തുടങ്ങിയ കാലഘട്ടം മുതലാണ് കള്ളന്മാരുടെ നീക്കം ഒരു സിനിമ കാണുന്നതുപോലെ നമുക്ക് കാണാന്‍ സാധിക്കുന്നത്. അവരുടെ ഓരോ അനക്കവും നാം പകര്‍ത്തി.

അതുകൊണ്ടു തന്നെ കള്ളന്മാരുടെ ചില അബദ്ധവും ക്യാമറകളില്‍ പതിയാറുണ്ട്. ഇപ്പോള്‍ അതുപോലെ ഒരു വീഡിയോ വൈറലാവുകയാണ്. മോഷണമോഹവുമായി എത്തിയ കള്ളന്‍ ഒരു ഭിത്തിയിലുളള ജനാലയ്ക്കു മുന്നിലെത്തുന്നു. ഏതോ മുറിയുടെ ജനാല ആവും അതെന്നോര്‍ത്ത് വളരെ കഷ്ടപ്പെട്ട് ബുദ്ധിമുട്ടി അത് വലിച്ചു തുറക്കുന്നു. തന്റെ ആദ്യകടമ്പ കടന്നു കിട്ടിയ ആശ്വാസത്തോടെ കള്ളന്‍ ജനാലയ്ക്കുള്ളിലൂടെ നുഴഞ്ഞുകയറി.

എന്നാല്‍ ആ ജനാല കള്ളനെ എത്തിച്ചത്, വെളിയില്‍ നിന്നു തന്നെ കാണാവുന്ന തുറന്നുകിടക്കുന്ന വിശാലമായ ഒരു വരാന്ത പോലുള്ള ഗ്യരേജിന്റെ ഭാഗത്തേക്കായിരുന്നു.ചുരുക്കിപ്പറഞ്ഞാല്‍ അവിടെ കയറാനായിരുന്നുവെങ്കില്‍ ഇത്ര ബുദ്ധിമുട്ടി ആ ജനല്‍ തുറക്കുകയേ വേണ്ടായിരുന്നു.വളരെ വിശാലമായി തുറന്നു കിടക്കയായിരുന്ന ഭാഗത്തുകൂടി ചുമ്മാതങ്ങ് നടന്നു കയറിയാല്‍ മതിയായിരുന്നു!

അതു മനസ്സിലാക്കിയ കള്ളന്‍ തുറന്നുകിടന്ന ഭാഗത്തുകൂടി പുറത്തുവന്നിട്ട് മോഷണ ശ്രമം ഉപേക്ഷിച്ച് ദേഷ്യത്തില്‍ നടന്നകലുകയും ചെയ്യുന്നു.