നീണ്ട എട്ടുമണിക്കൂര്‍ നാടിനെ വട്ടംകറക്കിയ നീര്‍നായ കുടുങ്ങി. മൃഗസംരക്ഷണ അധികൃതരും വനം വകുപ്പും ചേര്‍ന്നാണ് നീര്‍നായയ്ക്കായി കെണിയൊരുക്കിയത്. 

പള്ളിമുക്ക് പഴയാറ്റിന്‍കുഴി ഭാഗത്താണ് നീര്‍നായ പ്രത്യക്ഷപ്പെട്ടത്. ശബ്ദം കേട്ട് എത്തിയവരെ നീര്‍നായ ആക്രമിക്കാനും മടിച്ചില്ല.

നീര്‍നായയുടെ ആക്രമണത്തില്‍ പരിക്കേറ്റവരെ ആശുപത്രിയില്‍ പ്രവേശിപ്പിച്ചിട്ടുണ്ട്. പോലീസും അഗ്‌നിശമനസേനാംഗങ്ങളും എത്തിയെങ്കിലും നീര്‍നായ പിടികൊടുത്തില്ല. 

ജനം തടിച്ചുകൂടിയതോടെ നീര്‍നായയും ഫോമിലായി. പിന്നീട് ജില്ലാ വെറ്ററിനറി കേന്ദ്രത്തിലെ ഡോ.കെ.കെ തോമസും നായയെ പിടിക്കാന്‍ പരിശീലനം ലഭിച്ചിട്ടുള്ള കണ്ണന്‍ എന്ന യുവാവും സ്ഥലത്തെത്തി.

കണ്ണന്റെ നേതൃത്വത്തില്‍ രാത്രി ഏഴോടെയാണ് നീര്‍നായ പിടിയിലാകുന്നത്. കൂട്ടിലാക്കി വനംവകുപ്പ് അഞ്ചലിലേയ്ക്ക് കൊണ്ടുപോയി.