ലണ്ടനിലെ ഹീത്രോവില്‍ നിന്നും കാനഡയിലേക്കുള്ള ബ്രിട്ടീഷ് എയര്‍വേസ് വിമാനത്തില്‍ മദ്യപിച്ച് പ്രശ്‌നമുണ്ടാക്കിയ യാത്രക്കാരി മേഘ്‌ന കുമാര്‍ പിടിയിലായി. ഇന്ത്യന്‍ വംശജയായ ഇവര്‍ മദ്യപിച്ചുണ്ടാക്കിയ ബഹളത്തെ തുടര്‍ന്ന് വിമാനം രണ്ട് മണിക്കൂര്‍ വൈകിയെന്നാണ് റിപ്പോര്‍ട്ട്.

തുടര്‍ന്ന് മേഘ്‌നയെ വിമാനത്തില്‍ നിന്നും പിടിച്ചിറക്കിയതിനു ശേഷമാണ് ടേയ്ക്ക് ഓഫ് ചെയ്തത്. ഈ കേസില്‍ മേഘ്‌നയുടെ വിചാരണ തുടങ്ങി. മദ്യം മണക്കുന്ന മേഘ്‌ന വായില്‍ തോന്നുന്ന തെറികളാണ് മറ്റ് യാത്രക്കാര്‍ക്കും വിമാന ജീവനക്കാര്‍ക്കും നേരെ ചൊരിഞ്ഞിരുന്നതെന്ന് വിചാരണക്കിടെ ബോധിപ്പിക്കപ്പെട്ടിരുന്നു.

തുടര്‍ന്ന് ഈ 30 കാരി സീറ്റ് ബെല്‍ട്ടിടാന്‍ വിസമ്മതിച്ചും പ്രശ്‌നമുണ്ടാക്കിയിരുന്നു. ഹീത്രോവിലെ ബാറില്‍ വച്ചായിരുന്നു മേഘ്‌ന മദ്യപിച്ച് മദോന്മത്തയായിത്തീര്‍ന്നത്. തുടര്‍ന്ന് കാനഡയിലെ മോണ്‍ട്രിയലിലേക്ക് പോകാനിരുന്ന വിമാനം പുറപ്പെടാനാവാതെ രണ്ട് മണിക്കൂറോളം കിടക്കേണ്ടി വന്നുവെന്നും ഉക്‌സ്ബ്രിഡ്ജ് മജിസ്‌ട്രേറ്റ് കോടതിക്ക് മുന്നില്‍ ബോധിപ്പിക്കപ്പെട്ടിരുന്നു.

വെസ്റ്റ് ലണ്ടനിലെ കെന്‍സിങ്ടണിലാണ് മേഘ്‌ന താമസിക്കുന്നത്. ഈ വര്‍ഷം ഏപ്രില്‍ ഒമ്പതിനാണ് കേസിന് ആസ്പദമായ സംഭവം നടന്നത്. കോടതിയില്‍ വിചാരണക്കെത്തിയപ്പോഴും താന്‍ തെറ്റ് ചെയ്തുവെന്ന് സമ്മതിക്കാന്‍ മേഘ്‌ന തയ്യാറായിരുന്നില്ല.

ബാറില്‍ പോയി മദ്യപിച്ചിരുന്നതിനാല്‍ വിമാനത്തിലെത്താന്‍ മേഘ്‌ന വൈകിയിരുന്നുവെന്നാണ് പ്രോസിക്യൂട്ടറായ വിജ്യ ഖുട്ടന്‍ ബോധിപ്പിച്ചത്. വിമാനത്തില്‍ കയറിയ അവര്‍ ഏവരോടും കയര്‍ത്തിരുന്നുവെന്നും അദ്ദേഹം വെളിപ്പെടുത്തുന്നു. തന്റെ കക്ഷി കുറ്റമൊന്നും ചെയ്തിട്ടില്ലെന്നായിരുന്നു മേഘ്‌നയുടെ അഭിഭാഷകനായ അഹ്മദ് റാഫിക്ക് വാദിച്ചത്. കുററം കോടതിക്ക് മുന്നില്‍ ബോധ്യപ്പെട്ടാല്‍ വന്‍ തുക പിഴയോ ജയില്‍ ശിക്ഷയോ മേഘ്‌നയ്ക്ക് മേല്‍ ചുമത്തപ്പെടുന്നതാണ്. അടുത്ത മാസം ഐസ്ലെവര്‍ത്ത് ക്രൗണ്‍ കോടതിയില്‍ ഹാജരാകാന്‍ വേണ്ടി മേഘ്‌നയെ ജാമ്യത്തില്‍ വിട്ടിരിക്കുകയാണ്.