റോഡരികില്‍ നിര്‍ത്തിയിട്ടിരുന്ന നാഷണല്‍ പെര്‍മിറ്റ് ലോറി ജാക്കി വച്ച് ഉയര്‍ത്തി ടയറുകള്‍ കവര്‍ന്നു.

വാഴക്കുളം പരീക്കപ്പീടിക ഈസ്‌റ്റേണ്‍ കമ്പനിക്കു സമീപം നിര്‍ത്തിയിട്ടിരുന്ന ലോറിയുടെ പിന്നിലെ നാല് ടയറുകളാണ് കവര്‍ന്നത്. തിങ്കളാഴ്ച പുലര്‍ച്ചെയാണ് സംഭവം.

ഇതിനു സമീപമുള്ള ഗ്രൗണ്ടില്‍ രാത്രി 12 മണി വരെ യുവാക്കള്‍ ഷട്ടില്‍ കളിച്ചിരുന്നു. ഇവര്‍ പോയ ശേഷമാണ് കവര്‍ച്ച നടന്നത്. ലോറിയിലുണ്ടായിരുന്ന പടുതയും, വടവും മോഷ്ടാക്കള്‍ കൊണ്ടുപോയി.

തിരക്കേറിയ മൂവാറ്റുപുഴ-തൊടുപുഴ സംസ്ഥാന പാതയോരത്താണ് സാധാരണ രീതിയിലല്ലാത്ത കവര്‍ച്ച നടന്നത്. മോഷ്ടിച്ച് കൊണ്ടുവന്ന ജാക്കി ഉപയോഗിച്ചാണ് ലോറിയുടെ പിന്‍ഭാഗം ഉയര്‍ത്തിയിരിക്കുന്നത്.

വാഴക്കുളം പോലീസ് അന്വേഷണം തുടങ്ങി. ഒന്നര ലക്ഷം രൂപയുടെ നഷ്ടമുണ്ടായതായി ഉടമ പ്രിന്‍സ് സെബാസ്റ്റ്യന്‍ പറഞ്ഞു.