56 വര്‍ഷത്തിനിടെ ആദ്യമായി റീത്ത പിറന്നാള്‍ ആഘോഷിക്കുന്നു. ഇതുവരെ കണ്ടിട്ടില്ലാത്തതില്‍ വച്ച് ഏറ്റവും വലിയ പിറന്നാളാഘോഷം നടക്കുന്നത് ഡല്‍ഹി മൃഗശാലയിലാണ്.

കൃത്യമായ ജന്മദിനം അറിയില്ലെങ്കിലും റീത്ത എന്ന ചിമ്പാന്‍സി ഇന്ത്യയിലെത്തിയ സമയം കണക്കാക്കി ഏകദേശ ദിവസം നിജപ്പെടുത്തിയാണ് ജന്മദിനം ആഘോഷിക്കുന്നത്. ഡല്‍ഹി മൃഗശാലയിലെ ഏറ്റവും പ്രായമുള്ളതും ഒരേയൊരു ചിമ്പാന്‍സിയുമായ റീത്തയെ 1964 ഡിസംബര്‍ 15-ന് ആംസ്റ്റര്‍ഡാമില്‍ നിന്നാണ് ഇവിടെത്തിച്ചത്. അവിടത്തെ മൃഗശാലയിലായിരുന്നു റീത്തയുടെ ജനനം. 

ഏറ്റവും പ്രായമുള്ള മൃഗമായതുകൊണ്ടുതന്നെ മൃഗശാലയുടെ ഏറ്റവും പ്രധാനപ്പെട്ട താരമാണ് റീത്ത. ആദ്യകാലങ്ങളില്‍ സന്ദര്‍ശകരെ വളരെ സ്‌നേഹത്തോടെ സമീപിച്ചിരുന്നെങ്കിലും ഇപ്പോള്‍ അതിനു മുതിരാറില്ല. പ്രായത്തിന്റെ വെല്ലുവിളികളും ഒറ്റയ്ക്കായിപ്പോയതുമെല്ലാം ഇതിനു കാരണമാണെന്ന് മൃഗശാലാ അധികൃതര്‍ പറയുന്നു. 

ഇതിനു മുമ്പ് റീത്തയുടെ ഒപ്പമുണ്ടായിരുന്ന സുഹൃത്ത് മാക്‌സിനെ ജയ്പുര്‍ മൃഗശാലയ്ക്ക് കൈമാറിയിരുന്നു. വര്‍ഷങ്ങള്‍ക്കു മുമ്പ് മൂന്നു കുഞ്ഞുങ്ങള്‍ക്ക് റീത്ത ജന്മം നല്‍കിയെങ്കിലും അവ മരണമടഞ്ഞു.