വളര്‍ത്തുനായ്ക്കളോട് മാനസികമായി നല്ല അടുപ്പമുള്ളവര്‍ക്ക് അവരെ അല്‍പ്പനേരത്തക്കുപോലും പിരിഞ്ഞിരിക്കാന്‍ സാധിച്ചെന്നു വരില്ല. തന്റെ ജീവിതത്തിലെ ഏറ്റവും പ്രധാനപ്പെട്ട മുഹൂര്ത്തത്തില്‍ താന്‍ ഏറെ സ്‌നേഹിക്കുന്ന വളര്ത്തുനായയുടെ സാന്നിധ്യം ഉണ്ടാകില്ലെന്നറിഞ്ഞ് വിഷമിച്ച ഒരാളുടെ ആ വിഷമം അകറ്റിയ സംഭവമാണ് ഇപ്പോള്‍ വൈറലായി മാറുന്നത്.

ന്യൂയോര്‍ക്ക് സ്വദേശിയായ ഹില്ലരി ബൗള്‍സിന്റെ വിവാഹദിനത്തിലായിരുന്നു അവരെ അമ്പരപ്പിച്ച സംഭവം നടന്നത്. ഇവര്‍ ജീവനു തുല്യം സ്‌നേഹിക്കുന്ന ലിയോ എന്ന് പേരുള്ള വളര്‍ത്തുനായക്ക് വിവാഹദിനത്തില്‍ തന്റെ ഒപ്പം വരാന്‍ കഴിയില്ലെന്നറിഞ്ഞപ്പോള്‍ ഇവര്‍ സങ്കടത്തിലാഴുകയായിരുന്നു. കാരണം ഹില്ലരിയുടെ വീട്ടില്‍ നിന്നും വളരെ അകലെയായിരുന്നു വിവാഹം നടക്കുന്ന സ്ഥലം. അതുകൊണ്ട് ലിയോയെയും കൂടെ കൊണ്ടുപോയാല്‍ ശരിയാകില്ലന്ന് അവളുടെ അച്ഛന്‍ തീരുമാനിക്കുകയായിരുന്നു.

പക്ഷെ വിവാഹദിനത്തില്‍ ഹില്ലരി ഞെട്ടിപ്പോയി. കാരണം തന്റെ തൊട്ടുമുന്നില്‍ നില്‍ക്കുന്നു പ്രിയപ്പെട്ട ലിയോ. പക്ഷെ അത് ലിയോയുടെ വലിയ ഫോട്ടോ ആയിരുന്നു. കാര്‍ഡ് ബോര്‍ഡ് രൂപത്തിലുള്ള ലിയോയുടെ തിളങ്ങുന്ന രൂപമായിരുന്നു അത്. ഹില്ലരിയുടെ വിഷമം അവസാനിപ്പിക്കാന്‍ അച്ഛന്‍ കണ്ടുപിടിച്ച മാര്‍ഗമായിരുന്നു അത്. അതോടെ വരനെക്കാളും വധുവിനെക്കാളും ഹീറോ ആകുകയായിരുന്നു ഹില്ലരിയുടെ അച്ഛന്.

വിവാഹദിനത്തിലെ ചിത്രങ്ങള്‍ പകര്‍ത്തിയ ലൈഡിയ റൂത്ത് എന്ന ഫോട്ടോഗ്രാഫര്‍ ഈ ചിത്രങ്ങള്‍ സോഷ്യല്‍ മീഡിയായില്‍ പങ്കുവെച്ചതിനെ തുടര്‍്ന്ന് വൈറലാകുകയായിരുന്നു. ആദ്യം വിഷമിപ്പിച്ചുവെങ്കിലും അച്ഛന്‍ തന്ന സമ്മാനത്തില്‍ ഞാന്‍ മതിമറന്നു സന്തോഷിച്ചു എന്നാണ് ഹില്ലരി പറയുന്നത്.