സോഷ്യല്‍ മീഡിയയില്‍ ആളുകള്‍ പോസ്റ്റ് ചെയ്യുന്ന ചിത്രങ്ങളും വീഡിയോയും പലപ്പോഴും വൈറലാകാറുണ്ട്. അതിനൊക്കെ വ്യത്യസ്തമായ കാരണങ്ങളും ഉണ്ടായിരിക്കും. ബ്രെന്‍ഡ് കെല്ലി എന്നയാള്‍ എടുത്ത ഒരു ചിത്രവും ഇത്തരത്തില്‍ വൈറലാകുകയാണ്. എന്നാല്‍ ഈ ചിത്രം എല്ലാവരെയും ഒരു നിമിഷം ചിന്തിപ്പിക്കും.

98 ഡിഗ്രി ഫാരന്‍ഫീറ്റ് (36 ഡിഗ്രി സെല്‍ഷ്യസ്) ചൂടില്‍ തന്റെ ഭാര്യയ്ക്ക് ഭര്‍ത്താവ് സ്‌നേഹത്തോടെ കാറിലിരുന്ന് ഐസ്‌ക്രീം നല്‍കുന്നതാണ് ഈ ചിത്രം. എന്നാല്‍ ഈ ഭാര്യയുടെയും ഭര്‍ത്താവിന്റെയും പ്രായത്തെ കുറിച്ചും പെരുമാറ്റത്തെ കുറിച്ചുമാണ് സോഷ്യല്‍ മീഡിയ സംസാരിക്കുന്നത്.

98 ഡിഗ്രി ചൂടിലും അദ്ദേഹം ഒരിക്കലും സ്വയം ഐസ്‌ക്രീം കഴിക്കുന്നില്ല. കാറില്‍ കാലു ചവിട്ടുന്ന ഭാഗത്ത് ഒരു ടൗവ്വല്‍ ഇട്ട ശേഷം അതിലാണ് ഈ മുതിര്‍ന്നയാള്‍ ഇരിക്കുന്നത്. അദ്ദേഹത്തിന്റെ ഭാര്യ കാറിലെ സീറ്റിലാണ് ഇരിക്കുന്നത്. ഈ പ്രായത്തിലും അദ്ദേഹത്തിന് തന്റെ ഭാര്യയോടുള്ള കരുതലും സ്‌നേഹവുമാണ് സോഷ്യല്‍ മീഡിയയില്‍ എല്ലാവരും പങ്കുവെയ്ക്കുന്നത്.

ചെറുപ്പക്കാര്‍ക്ക് ഈ മനുഷ്യന്‍ ഒരു പാഠമാണെന്നാണ് ഇവര്‍ പറയുന്നത്. എല്ലായ്‌പ്പോഴും ഈ സ്‌നേഹം നിലനിര്‍ത്തണമെന്നാണ് ഒരാള്‍ പ്രതികരിച്ചത്. ജീവതാവസാനം വരെ അദ്ദേഹത്തിന്റെ പ്രണയം കൂടെയുണ്ടാകട്ടെയെന്നാണ് മറ്റൊരാള്‍ പറഞ്ഞത്.

ഇവരുടെ പ്രണയം വിശുദ്ധമാണ്, മരിക്കാത്തതാണ്, ബഹുമാനിക്കേണ്ടതാണ് എന്നാണ് മറ്റൊരാള്‍ പറയുന്നത്. ചിത്രത്തിന് ഇതിനോടകം തന്നെ 700,000 ലൈക്കുകളും, 282,000 ഷെയറുകളും ലഭിച്ചിട്ടുണ്ട്. 6000-ലധികം കമന്റുകളാണ് ചിത്രത്തിന് ലഭിച്ചത്.