ലോകത്തിലെ ഏറ്റവും വലിയ സമൂസയുമായി ലണ്ടന്‍. 153.1 കിലോഗ്രാം ഭാരമുള്ള സമൂസയാണ് ഉണ്ടാക്കിയത്. ലണ്ടനിലെ മുസ്ലിം എയ്ഡ് ചാരിറ്റി പ്രവര്‍ത്തകരാണ് ഭീമാകാമനായ സമൂസ ഉണ്ടാക്കി റെക്കോര്‍ഡിട്ടത്.

ഈസ്റ്റ് ലണ്ടനിലെ പള്ളിയില്‍ പ്രത്യേകം നിര്‍മ്മിച്ച പാത്രത്തിലാണ് ഭീമന്‍ സമൂസ ഉണ്ടാക്കിയത്. 2012 ജൂണില്‍ ഇംഗ്ലണ്ടിലെ ബ്രാഡ്‌ഫോര്‍ഡ് കോളേജില്‍ ഉണ്ടാക്കിയ 110.8 കിലോഗ്രാമുള്ള സമൂസയ്ക്കായിരുന്നു മുന്‍പുണ്ടായിരുന്ന റെക്കോര്‍ഡ്.

ഉരുളക്കിഴങ്ങ്, ഉള്ളി എന്നിങ്ങനെയുള്ള ചേരുവക ഒക്കെ ഈ ഭീമന്‍ സമൂസയിലും ഉള്‍പ്പെടുത്തിയിട്ടുണ്ട്. ഏകദേശം 15 മണിക്കൂര്‍ സമയം കൊണ്ട് 12 പേര്‍ ചേര്‍ന്നാണ് സമൂസ പാകപ്പെടുത്തിയെടുത്തത്.

സമൂസയ്ക്ക് രുചിയും ഗുണവും കുറവില്ലെന്ന് ഫുഡ് ടേസ്റ്റ് പ്രതിനിധി പറഞ്ഞു. സമൂസ വേവിച്ചെടുക്കുമ്പോള്‍ പൊട്ടി പോവുമോ എന്നായിരുന്നു തന്റെ പേടിയെന്ന് ഇത് ഉണ്ടാക്കാന്‍ നേതൃത്വം നല്‍കിയ ഫരീദ് ഇസ്ലാം പറയുന്നു.

എന്നാല്‍ പൊരിച്ചെടുത്തപ്പോഴും യാതൊരു വിധത്തിലുള്ള പ്രശ്‌നങ്ങളും സംഭവിച്ചില്ലെന്നും ത്രികോണാകൃതി നഷ്ടപ്പെട്ടില്ലെന്നും ഗിന്നസ് റെക്കോര്‍ഡ് വിധികര്‍ത്താവ് പ്രവീണ്‍ പട്ടേല്‍ പറഞ്ഞു. മികച്ച നേട്ടമാണ് ഇതെന്നും അദ്ദേഹം കൂട്ടിച്ചേര്‍ത്തു. റെക്കോര്‍ഡ് രേഖപ്പെടുത്തിയതിനു ശേഷം സമൂസ എല്ലാവര്‍ക്കും വിതരണം ചെയ്തു.