ജാമി ഗ്രാങ്ഗര്‍ എന്ന യുവാവ് അതിസാഹസത്തിന് മുതിര്‍ന്ന് പണി വാങ്ങിയിരിക്കുകയാണ്. 38026 രൂപയ്ക്ക് ബെറ്റ് വെച്ച് നഗ്‌നനായി തേനീച്ചക്കൂടിന് മുകളില്‍ ഇരിക്കുകയായിരുന്നു ഇദ്ദേഹം.

ഈ വിചിത്ര ബെറ്റ് നടന്നത് ന്യൂസിലന്‍ഡിലാണ്. 27-കാരനായ ജാമി തേനീച്ച വളര്‍ത്തല്‍ സൂക്ഷിപ്പുകാരനാണ്. ദിവസവും ആയിരക്കണക്കിന് തേനീച്ചകളോടാണ് ഇയാള്‍ ഇടപഴകുന്നത്.

തുടര്‍ന്ന് ഇയാളുടെ ബന്ധുവാണ് 30 സെക്കന്‍ഡ് തേനീച്ചക്കൂടിന് മുന്‍പില്‍ ഇരിക്കാമോയെന്ന് ചോദിച്ചത്. ഇരുവരും 38026 രൂപയ്ക്കാണ് ബെറ്റ് വെച്ചത്. ജാമി ഇരിക്കുന്നതിന് മുന്‍പ് ഒരാള്‍ ഇരുന്നെങ്കിലും 19 സെക്കന്‍ഡ് ആയപ്പോള്‍ കടി കൊണ്ട് എഴുന്നേല്‍ക്കുകയായിരുന്നു.

തുടര്‍ന്നാണ് ജാമി ഈ സാഹസത്തിന് മുതിര്‍ന്നത്. 30 സെക്കന്‍ഡ് ഇരുന്നാല്‍ ഇത്രയും തുക കിട്ടുമല്ലോയെന്നു മാത്രമേ താന്‍ ചിന്തിച്ചുള്ളുവെന്ന് ജാമി പറയുന്നു. തേനീച്ച കുത്തിയപ്പോള്‍ വേദന കടിച്ചമര്‍ത്തി ഇരുന്ന ജാമി,ബെറ്റ് പൂര്‍ത്തീകരിച്ചതിനു ശേഷം പിന്‍ഭാഗത്തിന്റെ പുകച്ചില്‍ സഹിക്കാനാവാതെ എഴുന്നേറ്റ് ഓടുകയായിരുന്നു.