മൊബൈല്‍ ഫോണ്‍ ശ്രേണിയിലെ ആപ്പിള്‍ ഉല്‍പ്പന്നമായ ഐഫോണ്‍ 8 പുറത്തിറങ്ങുന്നത് കഴിഞ്ഞ ദിവസങ്ങളില്‍ മാധ്യമങ്ങളിലൂടെയെല്ലാം എല്ലാവരും കണ്ടറിഞ്ഞതാണ്. അതിനൂതന ടെക്‌നോളജികളുമായാണ് ഫോണ്‍ വിപണി കീഴടക്കാന്‍ എത്തുന്നത്. ഫോണ്‍ വിപണിയില്‍ ലഭ്യമാകാന്‍ ഇനിയും ഒരാഴ്ചകൂടി കാത്തിരിക്കണം. എന്നാല്‍, ഇപ്പോള്‍ത്തന്നെ ഓസ്‌ട്രേലിയയിലെ സിഡ്‌നിയിലുള്ള ആപ്പിള്‍ ഔട്ട്‌ലെറ്റിനു മുമ്പില്‍ പുതിയ ഫോണിനുവേണ്ടി ഒരാള്‍ കാത്തിരിപ്പു തുടങ്ങിക്കഴിഞ്ഞു.

കുറോഷേ എന്ന സോഫ്റ്റ്‌വേയര്‍ ഡെവലപ്‌മെന്റ് വിദ്യാര്‍ഥിയാണ് ഒരാഴ്ചത്തേക്കുവേണ്ട സാധനസാമഗ്രഹികളുമായി കടയുടെ മുമ്പില്‍ തമ്പടിച്ചിരിക്കുന്നത്. മറ്റാരേക്കാളും മുമ്പേ ഐഫോണ്‍ 8 സ്വന്തമാക്കാനാണ് ഈ കഷ്ടപ്പാടുകളൊക്കെയെന്ന് ഇദ്ദേഹം പറയുന്നു. ക്യൂ നില്‍ക്കാന്‍ കൂടെ രണ്ടു കൂട്ടുകാരെക്കൂടി ഇദ്ദേഹം കൂട്ടിയിട്ടുണ്ട്. തനിക്ക് പുറത്തുപോകേണ്ടി വന്നാല്‍ പകരം ക്യൂവില്‍ നില്‍ക്കാനാണ് ഇവര്‍. അല്ലെങ്കില്‍ മറ്റാരെങ്കിലും തന്റെ സ്ഥാനം തട്ടിയെടുക്കുമോ എന്നാണ് പേടി. ക്യൂവില്‍നിന്നുള്ള വീഡിയോകള്‍ ഇദ്ദേഹം തന്റെ യൂടൂബ് ചാനലില്‍ പോസ്റ്റ് ചെയ്യുന്നുണ്ട്. തന്റെ ചാനലിലേക്ക് കൂടുതല്‍ പ്രേക്ഷകരെ ആകര്‍ഷിക്കുകയാണ് കുറോഷേയുടെ ലക്ഷ്യം.

മുമ്പ് ഐ ഫോണ്‍ 7 ഇറങ്ങിയപ്പോഴും കുറോഷേ നേരത്തേതന്നെ ഫോണ്‍ വാങ്ങാന്‍ എത്തിയിരുന്നു. അന്ന് ക്യൂവില്‍ മൂന്നാം സ്ഥാനമാണ് ഉണ്ടായിരുന്നത്. ഫോണ്‍ കൈയില്‍കിട്ടിക്കഴിഞ്ഞാല്‍ തന്റെ ചാനല്‍ വഴി തത്സമയ പ്രദര്‍ശനമുണ്ടായിരിക്കുമെന്ന് കുറോഷേ അറിയിച്ചിട്ടുണ്ട്.