യുഎസിലെ മസാച്യുസെറ്റ്‌സില്‍ 27 വര്‍ഷങ്ങള്‍ക്ക് മുമ്പ് ഒരേ ദിവസം ഒരേ ആശുപത്രിയില്‍ ജനിച്ച രണ്ടുപേര്‍ വര്‍ഷങ്ങള്‍ക്കു ശേഷം വിവാഹ ജീവിതത്തിലേക്കും ഒന്നിച്ചു കൈപിടിച്ചു നടന്നു.

ആരോണ്‍ ബെയ്‌റോസ് ജെസീക്ക ഗോമസ് ദമ്പതികള്‍ക്കാണ് ഈ അപൂര്‍വ്വ ഭാഗ്യമുണ്ടായത്. കഴിഞ്ഞ മാസമാണ് ഇരുവരും വിവാഹിതരായത്.

1990 ഏപ്രില്‍ 28-നാണ് മോര്‍ട്ടണ്‍ ഹോസ്പിറ്റലില്‍ ഇരുവരും ജനിച്ചത്. ഹൈസ്‌കൂള്‍ പഠന കാലയളവില്‍ മറ്റ് കൂട്ടുകാര്‍ മുഖേനയാണ് ഇരുവരും കണ്ടുമുട്ടിയത്. അന്നു മുതല്‍ മികച്ച സുഹൃദ്ബന്ധം ഇവര്‍ കാത്തുസൂക്ഷിച്ചിരുന്നു.

മാത്രമല്ല, എല്ലാ ജന്മദിനത്തിലും ഇവര്‍ പരസ്പരം സമ്മാനങ്ങള്‍ നല്‍കിയിരുന്നു. ജനിച്ചതും ഒരേ സമയത്താണെന്ന് വിശ്വസിക്കാനാണ് തങ്ങള്‍ക്ക് ഇഷ്ടമെന്നും ഇവര്‍ പറയുന്നു.