താന്‍ ജനിച്ച ലിംഗത്തില്‍ നിന്ന് ആരെങ്കിലും മാറുന്നത് മുഖം ചുളിച്ച് കാണുന്ന സമൂഹമാണിന്ന്. എന്നാല്‍ സോയ് എന്ന 12 വയസ്സുകാരന്‍ അവന്റെ തീരുമാനം ഉറക്കെപ്പറഞ്ഞപ്പോള്‍ മാതാപിതാക്കള്‍ ആ തീരുമാനത്തെ ഇരുകൈയും നീട്ടി സ്വീകരിച്ചു. മകനെ ലാളിച്ച മാതാപിതാക്കള്‍ക്ക് അന്നു മുതല്‍ ഒരു മകളെ സ്‌നേഹിക്കാന്‍ അവസരം കിട്ടി.

ആണ്‍കുട്ടിയായിരിക്കുന്നതിനേക്കാള്‍ പെണ്‍കുട്ടിയായി ജീവിക്കുമ്പോഴാണ് തന്റെ മനസ്സിന് സന്തോഷം തോന്നുന്നതെന്ന് തന്റെ 12-ാം വയസ്സിലാണ് സോയ് മനസ്സിലാക്കിയത്. അവന്‍ അതു മാതാപിതാക്കളോടു തുറന്നു പറഞ്ഞു. അവന്റെ അമ്മ കാരന്‍ മിഡില്‍റ്റണ്‍ സന്തോഷത്തോടെ ആ തീരുമാനത്തെ പിന്തുണച്ചു. അച്ഛനമ്മമാരുടെ പിന്തുണയോടെ സോയി പൂര്‍ണ്ണമായും പെണ്‍കുട്ടിയാവാനുള്ള ചികിത്സ ആരംഭിക്കാനുള്ള ഒരുക്കത്തിലാണ്.

''ഒരു ആണ്‍കുട്ടി ആയിരിക്കുന്നതിനേക്കാള്‍ പെണ്‍കുട്ടിയാവാനാണ് അവന്‍ മനസ്സുകൊണ്ട് ആഗ്രഹിക്കുന്നത്. അങ്ങനെയാവുമ്പോഴാണ് അവന് ആത്മവിശ്വാസവും സന്തോഷവും ലഭിക്കുന്നതും. അതുകൊണ്ട് ചികിത്സയ്ക്കും അതിനു ശേഷമുള്ള ജീവിതത്തിനും കുടുംബത്തിന്റെ ഭാഗത്തുനിന്നും സകലപിന്തുണയുമുണ്ടാവും.'' അമ്മ പറയുന്നു. ''ആണ്‍കുട്ടിയില്‍ നിന്ന് പെണ്‍കുട്ടിയിലേക്കുള്ള മാറ്റം അത്ര ലളിതമല്ലെന്നറിയാം. പക്ഷെ അവന്റെ തീരുമാനത്തിനൊപ്പം നില്‍ക്കാനാണ് ഞങ്ങള്‍ക്കിഷ്ടം.''അച്ഛന്‍ പറയുന്നതിങ്ങനെയാണ്.

സ്വന്തം സ്വത്വം എതിര്‍ലിംഗത്തില്‍പ്പെട്ടതാണെന്നു മക്കള്‍ തിരിച്ചറിഞ്ഞാല്‍ പോലും സമൂഹത്തെ ഭയന്ന് അച്ഛനമ്മമാര്‍ കുട്ടികളെ ഭയപ്പെടുത്താന്‍ നോക്കും. അവരില്‍ നിന്നൊക്കെ വ്യത്യസ്തരായി കുട്ടിയുടെ തീരുമാനത്തിനൊപ്പം നില്‍ക്കാന്‍ മനസ്സുകാണിച്ച ഈ മാതാപിതാക്കളെ ലോകം മാതൃകയാക്കണം എന്നാണ് ഡോക്ടര്‍മാര്‍ പറയുന്നത്.