ബഹുഭാര്യത്വം നിയമവിധേയമായ രാജ്യങ്ങളിലൊന്നാണ് ഇന്തോനേഷ്യ. പക്ഷെ ഒരു വിവാഹചടങ്ങില്‍ ഒരാളെ മാത്രമേ ഭാര്യയായി സ്വീകരിക്കാവു എന്ന് നിയമം വ്യക്തമാക്കുന്നുണ്ട്. എന്നാല്‍ അടുത്തടുത്ത ദിവസങ്ങളിലായി രണ്ടു യുവതികളെ വിവാഹം ചെയ്യാന്‍ ഒരാള്‍ തയാറെടുക്കുന്നതിന്റെ വാര്‍ത്തകള്‍ വൈറലാകുന്നു. വിവാഹത്തിനു മുന്നോടിയായി അദ്ദേഹം തയാറാക്കിയ കല്യാണക്കുറിയും ഏറെ ചര്‍ച്ചകള്‍ക്ക് വഴിവയ്ക്കുന്നുമുണ്ട്. കാരണം രണ്ടു വധുക്കള്‍ക്കൊപ്പം വരന്‍ നില്ക്കുന്ന കല്യാണക്കുറിയിലെ ചിത്രമാണ് കൗതുകമാകുന്നത്. അടുത്തടുത്ത ദിവസങ്ങളില്‍ ഒരാള്‍ തന്നെ രണ്ടു പെണ്‍കുട്ടികളെ വിവാഹം ചെയ്യുന്നതിനെ വിമര്‍ശിച്ച് നിരവധിയാളുകള്‍ രംഗത്തെത്തിയിട്ടുണ്ട്.

പന്‍സര്‍ എന്നാണ് വരന്റെ പേര്. സൗത്ത് സുമാത്രയിലെ തെലുക് കിജിംഗ് ഗ്രാമത്തില്‍ വച്ചാണ് ഈ വിവാഹം നടക്കുന്നത്. നവംബര്‍ അഞ്ചിനും എട്ടിനുമായാണ് വിവാഹം. അതിനു ശേഷം ഒമ്പതിന് പ്രദേശവാസികളെ എല്ലാവരെയും വിളിച്ചു ചേര്‍ത്ത് വലിയ ആഘോഷവുമുണ്ട്.

വധുക്കളില്‍ ഒരാളായ സിന്‍ഡ്ര ഇന്ദാ തൊട്ടടുത്ത ഗ്രാമവാസിയാണ്. രണ്ടാമത്തെയാളാകട്ടെ മറ്റൊരു സമുദായക്കാരിയും. വിവാഹത്തിന് രണ്ടു പെണ്‍കുട്ടികളുടെയും വീട്ടുകാര്‍ക്ക് സമ്മതമാണ്.

ഇന്തോനേഷ്യയില്‍ ബഹുഭാര്യത്വത്തെ സംബന്ധിച്ച വാര്‍ത്തകള്‍ മാധ്യമങ്ങളില്‍ നിറയുന്നത് ഇത് ആദ്യമല്ല. ഇതിനു മുമ്പ് മൂന്നു യുവാക്കള്‍ അടുത്തടുത്ത ദിവസങ്ങളിലായി ഒന്നിലധികം പെണ്‍കുട്ടികളെ വിവാഹം ചെയ്ത സംഭവം ഉണ്ടായിട്ടുണ്ടെന്നാണ് ഗ്രാമമുഖ്യന്‍ പറയുന്നത്. ഇതിനു മുമ്പ് ബഹുഭാര്യത്വം പിന്തുടരുന്നവര്‍ക്കായി സ്മാര്‍ട്ട് ഫോണില്‍ ഒരു ആപ്ലിക്കേഷന്‍ രംഗത്തെത്തിയതിന്റെ വാര്‍ത്തകള്‍ സോഷ്യല്‍ മീഡിയായില്‍ വൈറലായിരുന്നു.