മദ്യത്തിനായി പൊരിവെയിലത്ത് ഹെല്‍മറ്റും ധരിച്ച് സമയവും കാലവും നോക്കി ബീവറേജ് ഔട്ട്‌ലെറ്റുകള്‍ക്ക് മുന്നില്‍ കാത്തിരുന്ന കാലമൊക്കെ ഇനി മദ്യപര്‍ക്ക് മറക്കാം. ഇതിനായി ലിക്കര്‍ വെന്‍ഡിങ് മെഷിന്‍ വരുന്നതായി റിപ്പോര്‍ട്ട്. ഇതിനായി സര്‍ക്കാരിന് കേരള സ്‌റ്റേറ്റ് ബീവറേജസ് കോര്‍പ്പറേഷന്‍ ഒരു കരട് രേഖ സമര്‍പ്പിച്ചിട്ടുണ്ട്.

മറ്റ് വെന്‍ഡിങ്ങ് മെഷിനുകള്‍ പോലെതന്നെ പണം നിക്ഷേപിച്ച ശേഷം മദ്യം തിരഞ്ഞെടുത്തുകഴിഞ്ഞാല്‍ അത് ലഭിക്കും. മദ്യത്തിന്റെ ലഭ്യത കൂട്ടുക എന്നതല്ല മറിച്ച് ഔട്‌ലെറ്റുകളുടെ മുന്നിലുള്ള തിരക്ക് കുറയ്ക്കുക എന്ന ഉദ്ദേശത്തോടെ മാത്രമാണ് ഇത്തരം ഒരു ആശയത്തിലേക്ക് എത്തിയതെന്ന് അധികൃതര്‍ അറിയിച്ചു.

നേരത്തെ ബീവറേജിന് മുന്നിലുള്ള ക്യൂ കുറയ്ക്കുന്നതിനായി എന്ത് നടപടിയാണ് ചെയ്തിരിക്കുന്നതെന്ന് കെഎസ്ബിസിയോട് ഹൈക്കോടതി ചോദിച്ചിരുന്നു. പൊതുജനങ്ങള്‍ക്ക് ബുദ്ധിമുട്ടായി ഉപഭോക്താക്കള്‍ക്കായി വെയ്റ്റിങ് ഏരിയ അടക്കമുള്ള സൗകര്യങ്ങള്‍ ഒരുക്കിക്കൂടെ എന്നും ഹൈക്കോടതി ചോദിച്ചിരുന്നു.

ഇതേത്തുടര്‍ന്നാണ് ക്യൂ കുറയ്ക്കുവാനുള്ള ആശയവുമായി ബീവറേജസ് കോര്‍പ്പറേഷന്‍ രംഗത്തുവന്നിരിക്കുന്നത്. ഇത് ഫലം കാണുമെന്നാണ് കെഎസ്ബിസി വിലയിരുത്തുന്നത്. ഈ വര്‍ഷം അവസാനത്തോടെ ഔട്‌ലെറ്റുകള്‍ പൂര്‍ണമായും കംപ്യൂട്ടര്‍വത്കരിക്കുമെന്നും അധികൃതര്‍ പറഞ്ഞു. മദ്യ ഔട്‌ലെറ്റുകളും വിവിധ ബ്രാന്‍ഡുകളും കണ്ടെത്തുന്നതിനും സഹായിക്കുന്ന മൊബൈല്‍ ആപ്പും വികസിപ്പിക്കാനും പദ്ധതിയിട്ടിട്ടുണ്ട്.