ഓമനിച്ച് വളര്‍ത്തിയ നായയോടുള്ള സ്‌നേഹം അതിരുകടന്നപ്പോഴാണ് ആദല്‍ സ്മിത്ത് എന്ന 18-കാരി ആ തീരുമാനമെടുത്തത്. വളര്‍ത്തുനായ മാക്‌സിന്റെ കാല്‍പാദങ്ങളുടെ ചിത്രം തന്റെ ശരീരത്തില്‍ ടാറ്റു ചെയ്യുക. പക്ഷേ, പത്ത് വര്‍ഷത്തിനിപ്പുറം ആദല്‍ പറയുന്നു ജീവിതത്തില്‍ അവള്‍ ചെയ്ത ഏറ്റവും വലിയ മണ്ടത്തരമായിരുന്നു ആ തീരുമാനമെന്ന്.

2007-ലാണ് ആദല്‍ തന്റെ മാറിടത്തില്‍ ടാറ്റൂ ചെയ്തത്. അഭിമാനത്തോടെ ആ ടാറ്റുവുമണിഞ്ഞ് കോളേജിലെത്തിയപ്പോള്‍ ആദ്യമൊക്കെ എല്ലാവരും അവളെ പ്രശംസിച്ചു. വളര്‍ത്തുനായയോടുള്ള അവളുടെ സ്‌നേഹത്തെ വാനോളം പുകഴ്ത്തി. പക്ഷേ, അധികം വൈകാതെ കാര്യങ്ങള്‍ മാറിമറിഞ്ഞു. എല്ലാവര്‍ക്കും അവളോട് പറയാനുണ്ടായിരുന്നത് അവളുടെ മാറിടത്തെക്കുറിച്ച് മാത്രമായി. നായയുടെ കാല്‍ പാദങ്ങള്‍ ടാറ്റൂ ചെയ്തതുമായി ബന്ധപ്പെട്ട് പരിഹാസങ്ങളും ശക്തമായി.

ആദലിനെ പ്രേമിക്കാന്‍ അതിനു ശേഷം ആരും മുന്നോട്ട് വന്നില്ലെന്നതാണ് ഏറ്റവും പ്രധാനപ്പെട്ട കാര്യം. മാക്‌സിനോടുള്ള സ്‌നേഹക്കൂടുതലു കൊണ്ടാണ് ഞാനന്ന് അങ്ങനെ ചെയ്തത്. പക്ഷേ, ഇപ്പോഴാ ടാറ്റൂ കാണുമ്പോള്‍ ഞാനെന്ത് മണ്ടത്തരമാണ് കാണിച്ചത് എന്ന് മാത്രമാണ് എന്റെ മനസ്സിലേക്ക് വരിക. ആദല്‍ പറയുന്നു.

ഇപ്പോള്‍ കഴുത്തറ്റം വരെ മൂടിയ വേഷങ്ങള്‍ ധരിച്ചാണ് ആദലിന്റെ നടപ്പ്. ആ ടാറ്റൂ തന്റെ ആത്മവിശ്വാസം പോലും തകര്‍ത്തുകളഞ്ഞെന്നാണ് ആദല്‍ പറയുന്നത്. ടാറ്റൂ ഒഴിവാക്കാന്‍ ലേസര്‍ ചികിത്സ നടത്താനുള്ള തയ്യാറെടുപ്പിലാണ് ആദല്‍. പതിനെട്ട് മാസത്തോളം ചികിത്സ വേണ്ടിവരും ടാറ്റൂ പൂര്‍ണമായും ഒഴിവാക്കാന്‍. ചെലവാകട്ടെ ടാറ്റു കുത്താന്‍ മുടക്കിയതിന്റെ പത്തിരട്ടിയും.