സാഹസികത കാണിക്കാന്‍ ചിലര്‍ക്ക് ഒരു മടിയുമില്ല.മുന്‍പിന്‍ നോക്കാതെ ജീവന്‍ പണയം വെച്ചുള്ള പല സാഹസികതകളും നമ്മള്‍ കണ്ടിട്ടുണ്ട്. എന്നാല്‍ ഈ യുവാവിന്റെ വീഡിയോ കണ്ടാല്‍ ഇതൊരല്‍പ്പം കടന്നുപോയില്ലേ എന്ന് ആരും പറയും.

ദക്ഷിണാഫ്രിക്കയിലെ കേപ് ടൗണ്‍ തീരത്ത് കടലില്‍ നീന്തുകയായിരുന്ന യുവാവിന്റെ അധികം അകലെയല്ലാതെ തിമിംഗലങ്ങള്‍ പ്രത്യക്ഷപ്പെട്ടു. നിരവധിയാളുകള്‍ കടലില്‍ കുളിക്കുന്നുണ്ടായിരുന്നു. കാഴ്ചകണ്ട് പലരും ഭയചകിതരായി. എന്നാല്‍ ഈ യുവാവ് തിമിംഗലങ്ങള്‍ക്കുനേരെ നീന്തി ചെന്നു. പലരും അരുതെന്ന് വിളിച്ചുപറഞ്ഞിട്ടും കേള്‍ക്കാന്‍ കൂട്ടാക്കിയില്ല.

അവിടെയുണ്ടായിരുന്ന നാലു തിമിംഗലങ്ങളും ഇയാളുടെ രണ്ടു വശത്തുമായി ചുറ്റാന്‍ ആരംഭിച്ചു. ഈ സമയത്താണ് തിമിംഗലങ്ങളില്‍ ഒന്നിന്റെ പുറത്തേക്ക് ഇയാള്‍ കയറിയത്. പുറത്തു കയറിയതോടെ തിമിംഗലം ഇയാളുമായി അല്‍പനേരം നീന്തി. തിമിംഗലം വെള്ളത്തിലേക്ക് ഊളിയിട്ടതോടെ ഇയാള്‍ വീണ്ടും കടലിലേക്കു ചാടി.

മറൈന്‍ ലൈഫ് പ്രൊട്ടക്ഷന്‍ നിയമപ്രകാരം ദക്ഷിണാഫ്രിക്കയില്‍ തിമിംഗലങ്ങളെ ശല്യപ്പെടുത്തുന്നത് ക്രിമിനല്‍ കുറ്റമാണ്. ഇയാളെ തിരിച്ചറിഞ്ഞാല്‍ നടപടിയെടുക്കുമെന്നാണ് അധികൃതര്‍ അറിയിച്ചിരിക്കുന്നത്.