ഓ പ്രിയേ.. പ്രിയേ നിനക്കൊരു ഗാനം എന്നു പാടിക്കൊണ്ട് സിനിമയിലേയ്ക്ക് വന്നയാളാണ് കുഞ്ചാക്കോ ബോബന്‍. എന്നാല്‍, ഭാര്യ പ്രിയക്കുവേണ്ടി കഴിഞ്ഞ ദിവസം ചാക്കോച്ചന്‍ പാടിയ പാട്ട് കേട്ട് എല്ലാവരും ഞെട്ടി.

അനിയത്തിപ്രാവില്‍ നിന്ന് എന്നു വര്‍ണ്യത്തില്‍ ആശങ്കയില്‍ എത്തിയപ്പോഴേയ്ക്കും പഞ്ചാര കാമുകനില്‍ നിന്ന് പക്വതയുളള ഒരു നടനായി മാറിക്കഴിഞ്ഞ ചാക്കോച്ചന്‍ നന്നായി പാടുമെന്ന കാര്യം ഏറെപ്പേര്‍ക്കൊന്നും അറിയുമായിരുന്നില്ല.

അതുകൊണ്ടു തന്നെ ചാക്കോച്ചന്‍ പാട്ട് കേട്ടപ്പോള്‍ എല്ലാവരും ഒറ്റ സ്വരത്തില്‍ പറഞ്ഞു. അറിഞ്ഞില്ല, ആരുമൊന്നും പറഞ്ഞില്ല. പക്ഷേ, പാട്ടിന്റെ അവസാനം ഒരു സര്‍്രൈപസ് ഒളിപ്പിച്ചു വച്ചിരുന്നു ചാക്കോച്ചന്‍!

ആസിഫ് അലി നായകനായ കോഹിനൂര്‍ എന്ന ചിത്രത്തിലെ വിജയ് യേശുദാസ് ആലപിച്ച ഹേമന്തമെന്‍ എന്ന് തുടങ്ങുന്ന ഗാനമാണ് ചാക്കോച്ചന്‍ ഭാര്യയ്ക്കുവേണ്ടി പാടിയത്. ഭാര്യ പ്രിയയും ഒപ്പമുണ്ടായിരുന്നു.

എന്നാല്‍ പാട്ടു തീര്‍ന്നപ്പോഴാണ് ആ സത്യം മനസ്സിലാക്കിയത്. അത് വെറുമൊരു ലാലിസമായിരുന്നു. സിനിമയില്‍ കണ്ടുപരിചയിച്ച വെറും ചുണ്ടനക്കല്‍ പാട്ട് പാടിയത് സാക്ഷാല്‍ വിജയ് യേശുദാസ് തന്നെ. വീഡിയോയുടെ അവസാനമാണ് പാട്ടുകാരന്‍ പ്രത്യക്ഷപ്പെടുന്നത് കുഞ്ചാക്കോ ഫെയ്‌സ്ബുക്കില്‍ പോസ്റ്റ് ചെയ്ത വീഡിയോ ഇപ്പോള്‍ വൈറല്‍ ആയിരിക്കുകയാണ്.

ഭാര്യയ്ക്ക് ഒരു പാട്ടു ഞാന്‍ പാടി കൊടുക്കണം എന്നു പറഞ്ഞു. ഒട്ടും അമാന്തിച്ചില്ല ....അങ്ങ് വെച്ച് കാച്ചി. വിഡിയോ അവസാനം വരെയും കാണണം. എന്നാണ് ചാക്കോച്ചി വീഡിയോയ്ക്ക് താഴെ കുറിച്ചത്.