അടുത്തിടെ നവമാധ്യമങ്ങളില്‍ വൈറലായ ഒരു വീഡിയോയ്ക്ക് ഒട്ടും പ്രതീക്ഷിക്കാത്ത ഒരു ക്ലൈമാക്‌സ്. ബ്രസീലിലെ റിയോ ഡി ജനീറോയില്‍ നടന്നതാണ് ഈ സംഭവം.

വിജനമായ ഒരു കടയുടെ മുന്നില്‍ മൊബൈല്‍ ഫോണ്‍ നോക്കിയിരിക്കുന്ന യുവാവിന്റെ പിന്നില്‍ എത്തിയ ഒരു തെരുവുനായ അയാളുടെ ദേഹത്തേക്ക് മൂത്രമൊഴിച്ചിട്ടു പോകുന്ന വീഡിയോ ആയിരുന്നു അത്.

മലയാളത്തിലുള്‍പ്പടെ നവമാധ്യമങ്ങളില്‍ വൈറലായി ഈ വീഡിയോ. ഇതിനു മറ്റൊരു രസകരമായ അന്ത്യമുണ്ടായി. ഹെയ്ന്‍സ് സാഞ്ചെസ് എന്ന 27-കാരനാണ് വീഡിയോയിലൂടെ അപഹാസ്യനായത്. ഇയാള്‍ ആ നായയെ തൊഴിക്കുന്നതും വീഡിയോ ദൃശ്യങ്ങളിലുണ്ട്. എന്നാല്‍ ആ തെരുവു നായയെ കണ്ടെത്തി സംരക്ഷിക്കുകയാണ് ഈ യുവാവ് ഇപ്പോള്‍.

തെരുവില്‍ അലഞ്ഞു നടന്നിരുന്ന ആ നായയെ തന്റെ സംരക്ഷണയില്‍ വളര്‍ത്തുകയാണ് ഹെയ്ന്‍സ് സാഞ്ചെസ്. എന്‍സോ എന്ന പേരും ഈ നായക്കു നല്‍കി. ആദ്യം ദേഷ്യം വന്നതുകൊണ്ടാണ് താന്‍ നായയെ തൊഴിച്ചതെന്നും, പിന്നീട് കുറ്റബോധം വന്നപ്പോള്‍ നായയെ അന്വേഷിച്ചു കണ്ടുപിടിക്കുകയായിരുന്നുവെന്നും അദ്ദേഹം പറയുന്നു. എന്നാലും ഈ ക്ലൈമാക്‌സിന് ആദ്യ വീഡിയോയ്ക്കു കിട്ടിയതുപോലുള്ള ശ്രദ്ധകിട്ടിയില്ല എന്നു മാത്രം!