മനുഷ്യന് പലതരത്തിലുള്ള കഴിവുകളുണ്ട്. എങ്കിലും, ഇന്ന് തങ്ങളുടെ സാഹസങ്ങള്‍ മറ്റുള്ളവരെ കാണിക്കാന്‍ വേണ്ടി സോഷ്യല്‍ മീഡിയകളെ ഉപയോഗപ്പെടുത്താം എന്ന അവസ്ഥയിലായി. സ്വന്തം ശരീര ഭാഗങ്ങള്‍ റബ്ബര്‍ പോലെ ചലിപ്പിച്ച് ഏത് വിധേനയും മറ്റുള്ള ഉപകരണങ്ങളിലൂടെ നുഴഞ്ഞുകയറുവാന്‍ കഴിവുള്ള ഒരു യുവാവിന്റെ വീഡിയോയാണ് ഇപ്പോള്‍ പ്രചരിച്ചുകൊണ്ടിരിക്കുന്നത്. അമേരിക്കന്‍ സ്വദേശിയായ ഡാനിയല്‍ ബ്രൗണിംഗ് സ്മിത്താണ് ഈ അത്ഭുതപ്പെടുത്തുന്ന കഴിവിലൂടെ ലോകശ്രദ്ധ ആകര്‍ഷിക്കുന്നത്. തന്റെ ഈ കഴിവിനാല്‍ ഗിന്നസ് ബുക്കിലും ഇടം നേടിയിട്ടുണ്ട് ഈ 38-കാരന്‍.

സുഹൃത്തുക്കള്‍ക്കിടയില്‍ റബ്ബര്‍ മനുഷ്യന്‍ എന്ന പേരിലാണ് ഇദ്ദേഹം ഇപ്പോള്‍ അറിയപ്പെടുന്നത് തന്നെ. ചെറുപ്പത്തില്‍ സഹോദരങ്ങളുമൊത്ത് തല്ലു കൂടുമ്പോള്‍ ഡാനിയല്‍ മുറിയില്‍ പ്രത്യേക രീതികളില്‍ ഒളിച്ചിരിക്കാറുണ്ടായിരുന്നു.

പിന്നീട് വലുതാകും തോറും തന്റെ ഈ കഴിവുകളെ അയാള്‍ സ്വയം കൂടുതലായി മനസ്സിലാക്കുവാന്‍ തുടങ്ങി. പതിനെട്ടാം വയസ്സ് എത്തുമ്പോഴേക്കും തന്റെ ജീവിത വഴി ഇതാണെന്ന് ഡാനിയല്‍ ഉറപ്പിച്ചിരുന്നു. പിന്നെ അതിലേക്കുള്ള കഠിന പരിശ്രമങ്ങള്‍ നടത്തുന്നതിനു മാത്രമായി തുടര്‍ന്നുള്ള ജീവിതം. ഇപ്പോള്‍ ഡാനിയലിന്റെ ശരീര ഭാഗങ്ങള്‍ കൊണ്ടുള്ള ചലനങ്ങള്‍ കണ്ടാല്‍ ആരായാലും അന്തം വിട്ട് പോകും. ഇതിന് പിന്നിലെ രഹസ്യം ചോദിച്ചാല്‍ ഡാനിയലിന് ഒരൊറ്റ ഉത്തരം മാത്രമേ പറയാനുള്ളു. കഠിന പരിശ്രമത്തിലൂടെ ഈ ലോകത്ത് കീഴടക്കാന്‍ പറ്റാത്തതായി യാതൊന്നുമില്ലെന്ന്.