ഓണ്‍ലൈന്‍ ടാക്‌സി സര്‍വ്വീസുകളുടെ നിരക്ക് അനുദിനം കൂടുകയാണ്. എന്നാല്‍പ്പോലും കാനഡ സ്വദേശി വിളിച്ച ഊബര്‍ ടാക്‌സിക്ക് നല്‍കേണ്ടിവന്ന തുക അല്‍പം കൂടുതലല്ലേ എന്നാരും സമ്മതിച്ചു തരും.

അല്‍പമെന്നുവച്ചാല്‍ ചില്ലറയൊന്നുമല്ല. കേവലം എട്ടു കിലോമീറ്റര്‍ യാത്ര ചെയ്യാന്‍ 18,518 കനേഡിയന്‍ ഡോളറാണ് (9.36 ലക്ഷം രൂപ) നല്‍കേണ്ടിവന്നത്. ടൊറോന്റോയില്‍ വെള്ളിയാഴ്ചയാണ് സംഭവം.

ടാക്‌സി വിളിച്ച് കാശുപോയ യുവാവ് ബില്ലിന്റെ സ്‌ക്രീന്‍ഷോട്ട് സോഷ്യല്‍ മീഡിയയില്‍ പോസ്റ്റ് ചെയ്തതോടെയാണ് സംഭവം പുറംലോകമറിയുന്നത്.

7.7 കിലോമീറ്റര്‍ യാത്രചെയ്തതിന് യുവാവിന് ഊബര്‍ കമ്പനി നല്‍കിയത് 18,518 ഡോളറിന്റെ ബില്ല്. തെറ്റു മനസിലായതോടെ സാങ്കേതികപ്പിശകാണെന്ന് ചൂണ്ടിക്കാട്ടി ഊബര്‍ രംഗത്തെത്തി. യുവാവിന് മുഴുവന്‍ പണവും തിരികെ നല്‍കുമെന്നാണ് ഊബര്‍ അറിയിച്ചിരിക്കുന്നത്. യാത്രക്കാരനുണ്ടായ ബുദ്ധിമുട്ടില്‍ കമ്പനി ക്ഷമ ചോദിക്കുകയും ചെയ്തു.