ക്രിസ്മസ് ആഘോഷങ്ങളില്‍ ഒഴിച്ചു കൂടാനാവാത്ത ഒന്നാണ് പുല്‍ക്കൂടൊരുക്കല്‍. പണ്ടൊക്കെ ദേവാലയങ്ങളില്‍ മാത്രമായിരുന്നു, ഇപ്പോള്‍ എല്ലാ വീടുകളിലും പുല്‍ക്കൂടൊരുക്കാറുണ്ട്. ഉണ്ണിയേശു ജനിച്ചു വീണ കാലിത്തൊഴുത്തും കന്നുകാലികളും മാതാവും ഔസേപ്പ് പിതാവും ഭൂരാജാക്കന്‍മാരും മാലാഖയും നക്ഷത്രവും ഒക്കെ വച്ചാണ് നാം സാധാരണയായി പുല്‍ക്കൂടൊരുക്കുന്നത്. ഉണ്ണിയേശുവിന്റെ ജനനത്തിന്റെ ഓര്‍മ പുതുക്കലാണ് ഒരോ പുല്‍ക്കൂടുകളും. ഇവരുടെയെല്ലാം ചെറു രൂപങ്ങളാണല്ലോ നാം സാധാരണയായി പുല്‍ക്കൂടുകളില്‍ ഉപയോഗിക്കുന്നത്.

ഇതില്‍ നിന്നും വ്യത്യസ്തമായി കുഞ്ഞു വാവകളെക്കൊണ്ട് പുല്‍ക്കൂടൊരുക്കിയിരിക്കുകയാണൊരു ഫൊട്ടോഗ്രാഫറായ കൊറേലി. ചില്‍ഡ്രന്‍സ് ഫൊട്ടോഗ്രഫിയില്‍ സ്‌പെഷ്യലൈസ് ചെയ്യുകയാണ് ഇവര്‍. ഇത്തവണ ക്രിസ്മസ് എങ്ങനെ വ്യത്യസ്തമായി ആഘോഷിക്കാമെന്ന് തലപുകഞ്ഞപ്പോഴാണ് ഈ സൂപ്പര്‍ ഐഡിയ ഇവര്‍ക്ക് കിട്ടിയത്. വെറുതെ പുല്‍ക്കൂടൊരുക്കുക മാത്രമല്ല കൊറേലി ചെയ്തത് ഒപ്പം അടിപൊളി ഫോട്ടോ ഷൂട്ടുമങ്ങ് നടത്തി.

അതിനായി കുഞ്ഞുങ്ങളെ കണ്ടെത്തുക എന്നതായിരുന്നു ആദ്യ പടി. എട്ട് ദിവസം തൊട്ട് ഇരുപത്തിയാറ് ദിവസം വരെ പ്രായമുള്ള കുഞ്ഞുങ്ങളായിരുന്നു ഉണ്ടായിരുന്നത്. പിന്നീട് സെറ്റൊരുക്കി ഇവരെയെല്ലാം ഒരു ദിവസം ഒരുക്കുക എന്നത് അല്പം ശ്രമകരമായിരുന്നു. സഹോദരങ്ങളായ ക്രിസാന്തിയും ലോയിസോസുമാണ് മാതാവും ഔസേപ്പ് പിതാവുമായത്. ഭൂരാജാക്കന്‍മാരും ആട്ടിടയന്‍മാരും ആടും മാലാഖയുമൊക്കെയായി കുരുന്നുകളെ ഒരുക്കി. എല്ലാ കുഞ്ഞുങ്ങളും ഫോട്ടോഷൂട്ടിന് പൂര്‍ണമായി സഹകരിച്ചുവെന്നത് അത്ഭുതമായിട്ടാണ് അവര്‍ പറയുന്നത്. കുഞ്ഞുങ്ങളെ ഓരോരുത്തരേയും വളരെ സൂക്ഷിച്ചാണ് ഒരുക്കിയതും ഫോട്ടോഷൂട്ട് ചെയ്തതും. ഓരോര്‍ത്തര്‍ക്കും ഓരോ സഹായികളിമുണ്ടായിരുന്നു. ഈ സൂപ്പര്‍ ഡ്യൂപ്പര്‍ കുട്ടിമോഡലുകള്‍ ഇപ്പോള്‍ താരങ്ങളായിരിക്കുകയാണ്.