സെല്‍ഫിയെടുക്കാന്‍ ഫെഡറര്‍ കൂടെകൂട്ടിയതിന്റെ സന്തോഷത്തിലാണ് ക്വാക്ക! ചിരിയ്ക്കുന്നതു കണ്ടില്ലേ...?
ലോകത്തിലെ ഏറ്റവും സന്തോഷമുള്ള മൃഗത്തിനൊപ്പം ഒരു സെല്‍ഫിയെടുത്താലോ? ഇപ്പോള്‍ ഓസ്‌ട്രേലിയന്‍ പര്യടനത്തിലുള്ള ടെന്നീസ് താരം റോജര്‍ ഫെഡറര്‍ അത്തരത്തിലൊരു സെല്‍ഫിയെടുത്തു.
അദ്ദേഹം സെല്‍ഫിയെടുത്തത് റോട്ട്‌നെസ്റ്റ് ദ്വീപിലെ ക്വോക്ക മൃഗങ്ങളുടെയൊപ്പമാണ്. മൃഗങ്ങളുടെയൊപ്പം സെല്‍ഫിയെടുത്താല്‍ അപൂര്‍വ്വമായേ നല്ലൊരു ചിത്രം ലഭിക്കൂ. കുറേ ചിത്രമെടുത്തതിനൊപ്പം ഫെഡറര്‍ക്കും കിട്ടി അത്തരത്തിലൊരു നല്ല പടം. ഫെഡറര്‍ക്കൊപ്പം ചിരിച്ചുകൊണ്ടിരിക്കുന്ന ക്വോക്ക!
ഓസ്‌ട്രേലിയയിലെ റോട്ട്‌നെസ്റ്റ് ദ്വീപില്‍ കാണപ്പെടുന്ന ക്വോക്കകളെ ലോകത്തിലെ ഏറ്റവും സന്തോഷമുള്ള മൃഗങ്ങള്‍ എന്നാണ് വിശേഷിപ്പിക്കാറ്. സദാസമയവും ചുറുചുറുക്കോടെ നടക്കുന്നതും ആരോടും സൗഹൃത്തോടെ പെരുമാറുന്നതും ക്വോക്കകള്‍ക്ക് ഈ വിശേഷണം നേടിക്കൊടുത്തു.
പ്രകൃതിയിലെ ഇരപിടിയന്മാര്‍ ഈ ദ്വീപിലില്ലാത്തതിനാല്‍ ക്വോക്കകള്‍ സമാധാനത്തോടെയാണ് ഇവിടെ വിഹരിക്കുന്നത്. എന്നാല്‍ മനുഷ്യരുടെ അടുത്തേക്ക് അല്പം ഭീതിയോടെ മാത്രമേ ഇവര്‍ വരൂ.
'വലിയ എലിയാണെന്നാണ് തനിക്ക് ആദ്യം തോന്നിയത്. എന്നാല്‍, ചെറിയ കംഗാരുവിനോടാണ് ഇവയ്ക്ക് കൂടുതല്‍ സാമ്യം. ഭംഗിയുള്ളവരാണിവര്‍്' ഫെഡറര്‍ ട്വിറ്ററില്‍ കുറിച്ചു. ക്വാക്കകളുടെയൊപ്പമുള്ള ഫെഡററുടെ ചിത്രങ്ങള്‍ ഇന്റര്‍നെറ്റില്‍ വൈറലാണ്.
https://www.facebook.com/Malayalivartha
