ആക്രമിക്കാന്‍ വരുന്നത് മൃഗമായാലും മനുഷ്യനായാലും അതിനെ സൗമ്യഭാവങ്ങള്‍കൊണ്ട് പിന്തിരിപ്പിക്കാന്‍ നില്‍ക്കാതെ കണ്ടംവഴി ഓടിക്കോണം എന്ന് തന്നെയാണ് കുത്താന്‍ വരുന്ന പോത്തിനോട് വേദമോതരുത് എന്ന പഴഞ്ചൊല്ലിന്റെ സാരം. കുത്താന്‍ വരുമ്പോള്‍ സൗമ്യനായി നിന്നുനോക്കൂ പഴഞ്ചൊല്ലില്‍ പതിരുണ്ടോ എന്നു കാണാമല്ലോ എന്ന് ആരെങ്കിലും ചിന്തിച്ചിട്ടുണ്ടോ എന്നറിയില്ല. എന്നാല്‍ ആഫ്രിക്കയിലെ ക്രൂഗര്‍ നാഷണല്‍ പാര്‍ക്കിലെ ഗൈഡ് അലന്‍ മക്‌സ്മിത്ത്, പഴഞ്ചൊല്ലില്‍ പതിരുണ്ട് എന്ന് തെളിയിച്ചിരിക്കയാണ്!

ക്രൂഗര്‍ നാഷണല്‍ പാര്‍ക്കിലെത്തുന്ന സഞ്ചാരികള്‍ക്ക് വഴിതെളിക്കുന്ന ഗൈഡാണ് അലന്‍ മക്‌സ്മിത്ത്. അടുത്തിടെ തന്റെ ജോലി ചെയ്യുന്നതിനിടയില്‍ അലന് ഒരു അനുഭവമുണ്ടായി. ഒരു ഒറ്റയാന്‍ കലിപൂണ്ട് അടുത്തേക്ക് ഓടിയെത്തി. അലന് പിന്നിലായി സഞ്ചാരികളും. എന്നാല്‍ ആനയെ വെടിവയ്ക്കുകയോ വാഹനത്തിലേക്ക് ഓടിക്കയറി രക്ഷപ്പെടുകയോ ചെയ്യാതെ അലന്‍ ആനയെ വരുതിക്ക് നിര്‍ത്തി. അതും ഒരു ചെറിയ വടി മാത്രം ഉപയോഗിച്ചുകൊണ്ട്!

ഇതിന്റെ രഹസ്യം അലന്‍ വെളിപ്പെടുത്തുന്നുണ്ട്. ഏതെങ്കിലും പ്രത്യേക വിദ്യകളൊന്നുമല്ല പ്രയോഗിച്ചിരിക്കുന്നത്. വെറും ധൈര്യം മാത്രമാണ്. മാത്രമല്ല സ്ഥിരം ഇത്തരം അവസ്ഥകളില്‍ എത്തുമ്പോള്‍ രക്ഷപ്പെടാതെ വടികൊണ്ട് ഈ രീതി പരിശീലിച്ചു. മനസാന്നിധ്യവും ധൈര്യവുമാണ് വേണ്ടത്. എന്നാല്‍ പരിശീലനമില്ലാതെ ഇപ്പണി കാണിക്കരുതെന്നും അലന്‍ പറയുന്നുണ്ട്.

ശാന്തമായി ഈ സാഹചര്യം കൈകാര്യം ചെയ്യണമെന്നും അലന്‍ പറയുന്നു. ശാന്തതയില്‍നിന്നുള്ള ഊര്‍ജ്ജമാണ് തനിക്ക് അവയെ നിയന്ത്രിക്കാന്‍ സാധിക്കുന്നതില്‍ സഹായകരമാകുന്നത്. ഏതൊരു വന്യജീവിയേയും ഇത്തരത്തില്‍തന്നെ കൈകാര്യം ചെയ്താല്‍ അത് അവയ്ക്കും നമുക്കും അപകടമുണ്ടാകാതിരിക്കാന്‍ സഹായിക്കും. അലന്‍ പറയുന്നു.

തങ്ങളായിരുന്നെങ്കില്‍ മറുത്തൊന്ന് ചിന്തിക്കാതെ ആനയെ വെടിവച്ചേനെ എന്നാണ് മറ്റ് ഗൈഡുകളുടെ അഭിപ്രായം. അന്തര്‍ദേശീയ മാധ്യമങ്ങളില്‍ വാര്‍ത്തയോട് പ്രതികരിക്കുന്നവരും ഗൈഡിന്റെ അസാമാന്യ പ്രകടനം കണ്ട് അതിശയിക്കുകയാണ്. ജീവന്‍ പണയപ്പെടുത്തി മാത്രമേ ഈ വിദ്യയ്ക്ക് തുനിയാവൂ എന്നാണ് അഭിപ്രായങ്ങള്‍.