ടിവി ലൈവ് ഷോയ്ക്കിടെ അബദ്ധങ്ങളും അപ്രതീക്ഷിത സംഭവങ്ങളും ഉണ്ടാവുക സാധാരണമാണ്. പ്രത്യേകിച്ച് പുറംവാതില്‍ ഷൂട്ടിംഗുകളുടെ സമയത്ത് അതിന് സാധ്യത കൂടുതലാണ്. അടുത്തിടെയായി ലൈവ് റിപ്പോര്‍ട്ടിംഗിനിടെ അത്തരം അബദ്ധങ്ങള്‍ സംഭവിച്ചതിന്റെ പലദൃശ്യങ്ങളും വൈറലായിരുന്നു.

അത്തരത്തിലൊന്നാണ് ബിബിസി ടു ചാനലിന്റെ റിപ്പോര്‍ട്ടര്‍ അലക്‌സ് ഡണ്‍ലപ്പിന് സംഭവിച്ചത്. ലൈവായി വാര്‍ത്ത അവതരിപ്പിക്കുന്നതിനിടെ ലീമര്‍ എന്നയിനം ജീവികള്‍ എവിടെ നിന്നൊക്കയോ പാഞ്ഞുവന്ന് അദ്ദേഹത്തിന്റെ ശരീരത്തില്‍ ഓടിക്കയറുകയായിരുന്നു.

ഇംഗ്ലണ്ടിലെ ന്യൂഫോക്കിലുള്ള ബന്‍ഹാം മൃഗശാലയിലായിരുന്നു സംഭവം. ലീമറുകള്‍ അദ്ദേഹത്തിന്റെ ശരീരത്തില്‍ കൂടി ചാടി നടക്കുന്നതിന്റെ വീഡിയോ ബിബിസി ടു തങ്ങളുടെ ഫെയ്‌സ്ബുക്ക് പേജില്‍ പങ്കുവെച്ചിട്ടുണ്ട്. 3.3 മില്യണ്‍ ആളുകളാണ് ഈ വൈറലായിക്കൊണ്ടിരിക്കുന്ന വീഡിയോ ഇതുവരെ കണ്ടുകഴിഞ്ഞത്.