അമേരിക്കയിലെ നോര്‍ത്ത് കരോലീനയില്‍ ഒരു വീട് പൊളിക്കാനെത്തിയ മുനിസിപ്പാലിറ്റി തൊഴിലാളികള്‍ വര്‍ഷങ്ങളായി പൂട്ടിക്കിടക്കുന്ന വീടിനുള്ളില്‍ നിന്നും കോടികള്‍ വിലമതിക്കുന്ന കാറുകള്‍ കണ്ടെത്തി. ഇരുപത്തിയേഴു വര്‍ഷങ്ങളായി പൂട്ടിക്കിടക്കുന്ന വീടാണിത്.

ഫെറാറിയുടെ 12 സിലിണ്ടര്‍ കാറായ 1966 മോഡല്‍ 275, ജിടിബി, 1976 മോഡല്‍ ഷെല്‍ബി കോബ്ര, മോര്‍ഗന്‍, ട്രയംഫ് ടിആര്‍6 തുടങ്ങിയ കാറുകളാണ് ഈ വീട്ടില്‍ നിന്നും കണ്ടെത്തിയത്. ഇവയിലെ രണ്ട് കാറുകള്‍ക്ക് മാത്രമായി 2.8 ദശലക്ഷം പൗണ്ട് ഇപ്പോഴും കിട്ടുമെന്ന് ക്ലാസിക് കാര്‍ ഇന്‍ഷുറന്‍സ് കമ്പനിയായ ഹഗേര്‍ട്ടി അറിയിച്ചു.

ഹഗേര്‍ട്ടിയുടെ യൂട്യൂബ് ചാനലായ ബാര്‍ണ്‍ ഫൈന്‍ഡ് ഹണ്ടറില്‍ സംപ്രേക്ഷണം ചെയ്ത ഈ കാറുകളെ പറ്റിയള്ള വിവരങ്ങള്‍ ലക്ഷക്കണക്കിനാളുകളാണ് കണ്ടത്. കാര്യങ്ങളറിഞ്ഞെത്തിയ കാറുകളുടെ യഥാര്‍ത്ഥ ഉടമസ്ഥന്‍ ഫെറാരിയും ഷെല്‍ബിയും ലേലം ചെയ്യാനാണ് തീരുമാനിച്ചിരിക്കുന്നത്.