ആസ്‌ട്രേലിയയിലെ ക്വീന്‍സ് ലാന്റിലെ മുട്ട കര്‍ഷകന് തന്റെ ഫാമില്‍ നിന്ന് സാധാരണ മുട്ടയുടെ മൂന്നിരട്ടി വലിപ്പമുള്ള മുട്ട ലഭിച്ചു. അത് പൊട്ടിച്ചപ്പോള്‍ ആ വലിയ മുട്ടക്കുള്ളില്‍ ഒളിഞ്ഞിരിക്കുന്ന അത്ഭുതം കണ്ട് ഫാം ജീവനക്കാര്‍ പോലും ഞെട്ടി. അതിനകത്ത് സാധാരണ വലിപ്പമുള്ള മറ്റൊരു മുട്ടയാണ് ഉണ്ടായിരുന്നത്. അമ്പരപ്പിക്കുന്ന കണ്ടെത്തല്‍ ഫാം അധികൃതര്‍ ഫെയ്ബുക്കില്‍ പോസ്റ്റ് ചെയ്തതോടെ വൈറല്‍ ആയി.

മുട്ട ശേഖരിക്കുന്ന സിപ്പി എന്നയാള്‍ക്കാണ് ഫാമില്‍ നിന്ന് ഭീമന്‍ മുട്ട ലഭിച്ചത്. 176 ഗ്രാം തൂക്കമുള്ളതായിരുന്നു മുട്ട. ശരാശരി മുട്ടയുടെ തൂക്കം 58 ഗ്രാം ആണ്. എന്നാല്‍ അതിന്റെ മൂന്നിരട്ടി വരുന്നതാണ് ഫാമില്‍ നിന്ന് ലഭിച്ചത്. റ്റോക്ക്മാന്‍ എന്ന ഫാം ഹൗസിന്റെ ഉടമസ്ഥന്‍ മുട്ട ലഭിച്ച ഉടന്‍ ജീവനക്കാരെ മുഴുവന്‍ വിളിച്ചുകൂട്ടുകയും മുട്ട പൊട്ടിക്കുകയും ചെയ്തു. വലിയ മുട്ടക്കകത്ത് നാല് മഞ്ഞക്കരു ഉണ്ടായിരിക്കുമെന്ന പ്രതീക്ഷയിലാണ് പൊട്ടിച്ചതെന്ന് ഇവര്‍ പറയുന്നു. എന്നാല്‍ അവരുടെ പ്രതീക്ഷകള്‍ക്ക് വിരുദ്ധമായി വലിയ മുട്ടക്കകത്ത് മറ്റൊരു മുട്ട കണ്ടെത്തുകയായിരുന്നു.

1923-ല്‍ തുടങ്ങിയ ഫാമില്‍ നിന്ന് ഇതുവരെ ലഭിച്ച ഏറ്റവും വലിയ മുട്ടയാണ് ഇത്തവണ ലഭിച്ചത്. റഷ്യന്‍ ബാബുഷ്‌ക കളിപ്പാവകളോട് സാദൃശ്യമുള്ളതിനാല്‍ വലിയ മുട്ടയെ വിദഗ്ദര്‍ ബാബുഷ്‌ക മുട്ട എന്ന പേരാണ് വിളിച്ചിരിക്കുന്നത്. ഇത് എങ്ങനെ സംഭവിച്ചുവെന്ന് അറിയില്ലെന്നാണ് ആസ്‌ട്രേലിയയിലെ ചാള്‍സ് സ്റ്റുവര്‍ട് യൂനിവേഴ്‌സിറ്റിയിലെ വെറ്ററിനറി സയന്‍സ് സ്‌കൂളിലെ അസോസിയേറ്റ് പ്രൊഫസര്‍ റാഫ് ഫ്രെയര്‍ പറയുന്നത്. സാധാരണഗതിയില്‍ രൂപപ്പെട്ട മുട്ട ഇടാന്‍ കോഴി വൈകിയിട്ടുണ്ടാവാമെന്നും അത് വലിയ മുട്ട രൂപപ്പെടാന്‍ സാഹചര്യമൊരുക്കിയിരിക്കാമെന്ന ഊഹത്തിലാണ് ഇവര്‍.