തീയില്‍ കത്തിയമര്‍ന്ന ബഹുനില കെട്ടിടത്തില്‍ നിന്നും രക്ഷപെടാന്‍ ശ്രമിക്കുന്നതിനിടയില്‍ രണ്ടു യുവതികള്‍ ബാല്‍ക്കണിയില്‍ നിന്നും താഴേക്കു വീഴുന്നതിന്റെ ഞെട്ടിക്കുന്ന ദൃശ്യങ്ങള്‍ പുറത്ത്. തുര്‍ക്കിയിലെ വിനോദസഞ്ചാര കേന്ദ്രമായ ഇസ്മീറിലുള്ള ഒരു ഹോട്ടലിലായിരുന്നു തീപിടുത്തമുണ്ടായത്.

കെട്ടിടത്തിന്റെ ആറാം നിലയിലെ ബാല്‍ക്കണിയിലാണ് ഈ യുവതിയും മറ്റൊരു യുവതിയും കുടുങ്ങി പോയത്. ഈ സമയം ഇവര്‍ക്കു സമീപം തീ കത്തിയമരുന്നത് ദൃശ്യങ്ങളില്‍ വ്യക്തമാണ്. തുടര്‍ന്ന് രക്ഷപെടാനുള്ള ശ്രമത്തിനിടയില്‍ ഇവരില്‍ ഒരാള്‍ താഴേക്കു വീഴുകയായിരുന്നു. താഴെ നിര്‍ത്തിയിട്ടിരുന്ന ഒരു കാറിനു മുകളിലേക്കാണ് ഇവര്‍ വീണത്. ഇവര്‍ക്കു പിന്നാലെ അടുത്തയാളും ചാടി.

ആശുപത്രിയില്‍ പ്രവേശിപ്പിച്ച ഇരുവര്‍ക്കും ഗുരുതര പരിക്കുകളേറ്റിട്ടുണ്ട്. കെട്ടിടത്തില് ഉണ്ടായിരുന്ന എല്ലാവരെയും സുരക്ഷിതമായി രക്ഷിച്ചെങ്കിലും പുക ശ്വസിച്ച രണ്ടു പേരെയും ആശുപത്രിയില്‍ പ്രവേശിപ്പിച്ചിട്ടുണ്ട്. ഒരു മൊബൈല്‍ ഫോണ്‍ പൊട്ടിത്തെറിച്ചതാണ് അപകട കാരണം. സമീപം നിന്നയൊരാളാണ് അപകടത്തിന്റെ ദൃശ്യങ്ങള്‍ പകര്‍ത്തിയത്.