പാമ്പ് ഇരയെ വിഴുങ്ങുന്നതും പാമ്പിനെ ആളുകള്‍ പിടികൂടുന്നതുമായ നിരവധി കാഴ്ചകള്‍ സമൂഹമാധ്യമങ്ങളില്‍ കാണാറുണ്ട്. എന്നാല്‍ മുട്ട ഛര്‍ദ്ദിക്കുന്ന മൂര്‍ഖന്റെ വീഡിയോ ആണ് ഇപ്പോള്‍ ഏവരെയും ഞെട്ടിക്കുന്നത്.

ചിക്കമംഗലൂരിലുള്ള ഒരു വീട്ടിലെ അടുക്കളയിലാണ് മൂര്‍ഖനെ ആദ്യം കണ്ടെത്തുന്നത്. പാമ്പ് നീങ്ങുന്നത് കണ്ട് പേടിച്ച വീട്ടുകാര്‍ വടി എടുത്തപ്പോള്‍ ഉടനെ പാമ്പ് വീട്ടുമുറ്റത്തെ കലുങ്കിന് അടിയില്‍ ഒളിക്കാന്‍ ശ്രമിച്ചു. പിന്നീടും പാമ്പ് പടം ഉയര്‍ത്തി മുന്നോട്ട് വന്നപ്പോഴാണ് വീട്ടുകാരെ ഞെട്ടിച്ച ആ സംഭവം നടന്നത്. നിമിഷങ്ങള്‍ക്കുള്ളില്‍ മൂന്ന് മുട്ടകള്‍ ഓരോന്നായി പാമ്പിന്റെ വായില്‍ നിന്നും പുറത്തേക്ക് വന്നു. ശേഷം രക്ഷപ്പെടാന്‍ ശ്രമിച്ച പാമ്പിനെ കൂടയിലാക്കി വനത്തിലേക്ക് തുറന്നുവിട്ടു.

പാമ്പുകള്‍ സാധാരണയായി വിഷമഘട്ടങ്ങളിലോ ഭീഷണി നേരിടുമ്പോഴോ കഴിച്ച ഭക്ഷണം പുറത്തേക്ക് കളയാറുണ്ടെന്നാണ് വിദഗ്ധര്‍ പറയുന്നത്. മൂര്‍ഖന്‍ എങ്ങനെയാണ് മുട്ട വായിലാക്കിയതെന്ന കാര്യത്തില്‍ ഉത്തരമില്ല. പക്ഷേ ഏതായാലും മുട്ട ഛര്‍ദ്ദിക്കുന്ന പാമ്പിന്റെ വീഡിയോ ശരിക്കും ഞെട്ടിക്കുന്നത് തന്നെയാണ്.