സമൂഹത്തില്‍ നമുക്കു ചുറ്റും നടക്കുന്ന പല കാര്യങ്ങളും കാണുകയും കേള്‍ക്കുകയും ചെയ്യുമ്പോള്‍ മനുഷ്യവര്‍ഗ്ഗത്തിന്‍ മേലുള്ള വിശ്വാസം നഷ്ടപ്പെട്ടെന്ന് തോന്നിയിട്ടുണ്ടോ? ഇനി ഭൂമിയില്‍ നന്മയ്ക്കും മാനുഷിക അധ്വാനത്തിനുമൊന്നും ഒരു സ്ഥാനവുമില്ലെന്നും മറ്റുള്ളവരില്‍ നിന്ന് അന്യായമായി പിടിച്ചുപറി നടത്തുന്നവര്‍ക്ക് മാത്രമാണ് വിജയവും അംഗീകാരവുമൊക്കെ ലഭിക്കുന്നത് എന്നിങ്ങനെയൊക്കെയുള്ള നിരാശ ബാധിച്ചു കഴിഞ്ഞുവോ ? എങ്കില്‍ തീര്‍ച്ചയായും നിങ്ങള്‍ ഈ വീഡിയോ കാണണം.

നന്മയുള്ള മനുഷ്യന്‍ ഇന്നും അജയ്യനാണ്. സ്ഥിരോത്സാഹിയായ ഏതൊരാള്‍ക്കും പ്രതിബന്ധങ്ങളെ മറികടക്കുവാനും ലക്ഷ്യം നേടുവാനും സാധിക്കും. കഠിന സമര്‍പ്പണവും വെല്ലുവിളികള്‍ക്കുമുമ്പില്‍ പതറാത്ത ചങ്കൂറ്റവും മാത്രം ഉണ്ടായാല്‍ മതി. അനീതിയേയും അക്രമത്തേയുമൊക്കെ കീഴടക്കി മുന്നേറാനുള്ള ഊര്‍ജ്ജം എല്ലാ മനുഷ്യരിലുമുണ്ട്. അത് ഓര്‍മ്മയില്‍ വച്ചാല്‍ മതി.

പീപ്പിള്‍ ആര്‍ ഓസം എന്ന യൂ ട്യൂബ് ചാനല്‍ റെക്കോര്‍ഡ് ചെയ്ത് കോര്‍ത്തിണക്കിയ ദൃശ്യങ്ങളാണിവ. കൃത്യമായ ലക്ഷ്യങ്ങള്‍ മുന്നില്‍ കണ്ടു കൊണ്ട് പ്രവര്‍ത്തിക്കുമ്പോള്‍ മുന്നില്‍ പ്രതിസന്ധികള്‍ ധാരാളമുണ്ടാവും. അവയെ അവഗണിച്ചു കൊണ്ട് മുന്നോട്ടു തന്നെ പോയാല്‍ ലക്ഷ്യം നേടാനുള്ള കരുത്ത് ഓരോരുത്തരിലുമുണ്ട്. നമ്മുടെ ഉള്ളിലുള്ളത് ഒരു തീപ്പൊരി മാത്രമാണ്. അതിനെ വലിയൊരു തീജ്വാലയാക്കി ആളിക്കത്തിക്കേണ്ടത് നാം തന്നെയാണെന്ന് വിളിച്ചു പറയുകയാണ് ഈ വീഡിയോ.