ബ്രസീലിലെ ഒരു സെമിത്തേരിയില്‍ നിന്നും പകര്‍ത്തിയതായി പറയുന്ന ദൃശ്യങ്ങള്‍ വൈറലാവുകയാണ്. ശവപ്പറമ്പിലെ ഒരു കല്ലറയ്ക്കു മുകളില്‍ വെള്ളവസ്ത്രവും ധരിച്ച് അരികിലൊരു കുപ്പിയില്‍ രക്തനിറമുള്ള ദ്രാവകവുമായി ഇരിക്കുന്ന ഒരു കുട്ടിയേയാണ് ദൃശ്യങ്ങളില്‍ കാണുന്നത്. ഒന്നു കൂടി സൂക്ഷിച്ചു നോക്കിയാല്‍ മാത്രമേ അതൊരു പാവയാണെന്ന് മനസ്സിലാകൂ.

അത് പാവയാണെങ്കിലും അതിന്റെ ഭാവാഹാദികളെല്ലാം ജീവനുള്ള ഒരു കുഞ്ഞിന്റേതിനു സമാനമാണ്. കൂടാതെ ദൃശ്യം പകര്‍ത്തുന്ന കാമറയ്‌ക്കൊപ്പം അതിന്റെ കണ്ണുകള്‍ നീങ്ങുന്നുമുണ്ട്. ബ്രസീലില്‍ നിന്നും ഒരു സ്ത്രീ പകര്‍ത്തിയതായി പറയുന്ന ദൃശ്യങ്ങള്‍ ഇപ്പോള്‍ മെക്‌സിക്കന്‍ മാധ്യമങ്ങളില്‍ വന്‍ വാര്‍ത്തയായിരിക്കുകയാണ് . സോഷ്യല്‍ മീഡിയ ഉപഭോക്താക്കളും ഇതിനോട് പ്രതികരിക്കുന്നുണ്ട്.

ഡെവിളിന്റെ പാവക്കുട്ടിയാണ് ഇതെന്നായിരുന്നു ഒരാളുടെ പ്രതികരണം. ആ പാവയുടെ മിഴികളുടെ ചലനം വെറും ഓപ്റ്റിക്കല്‍ ഇല്യൂഷനാണെന്ന് പറയുന്ന മറ്റൊരാള്‍ അതു കൊണ്ടൊന്നും ഇതുണര്‍ത്തുന്ന ഭീതിയുടെ വ്യാപ്തി കുറയുന്നില്ലെന്ന് സമ്മതിക്കുന്നുമുണ്ട്.

മെക്‌സിക്കോക്കാര്‍ക്ക് അല്ലെങ്കില്‍ തന്നെ ഇത്തരം പാവകളോട് ഇടപെട്ട് ശീലമുള്ളതാണ്. പാവകള്‍ക്കായി സമര്‍പ്പിക്കപ്പെട്ടിട്ടുള്ള ഒരു ദ്വീപ് തന്നെ അവര്‍ക്കവിടെയുണ്ട്. മെക്‌സിക്കോ പട്ടണത്തിനും സോഷിമികോ കനാലിനും ഇടയിലാണ് പാവകളുടെ ദ്വീപ്. ജൂലിയന്‍ സന്റാന ബരേര എന്ന, ദ്വീപിന്റെ സൂക്ഷിപ്പുകാരന്‍ ഒരിക്കല്‍ ഒരു കൊച്ചു പെണ്‍കുട്ടിയുടെ മൃതദേഹം ദ്വീപില്‍ കണ്ടത്രേ.

തുടര്‍ന്ന് ഈ ഓര്‍മ്മ അയാളില്‍ നിന്നും വിട്ടു പോകുന്നേ ഉണ്ടായിരുന്നി. മൃതദേഹം കണ്ട് അല്പ ദിവസത്തിനകം അവിടെ നിന്നും ഒരു പാവയെ കൂടി അയാള്‍ക്ക് കിട്ടി. അത് ആ കുട്ടിയുടെ പാവയാണെന്ന് അയാള്‍ക്ക് തോന്നി. ആ കുട്ടിയുടെ ആത്മാവ് അയാളെ ഉപദ്രവിക്കാതിരിക്കാന്‍ അയാള്‍ ആ പാവയെ ഒരു മരത്തില്‍ കെട്ടി തൂക്കിയിട്ടു. പിന്നീട് അയാള്‍ അനവധി പാവകളെ മരത്തില്‍ തൂക്കിയിട്ടു. ഇപ്പോള്‍ അവിടം സന്ദര്‍ശിക്കുന്നവരെല്ലാവരും അവിടത്തെ മരങ്ങളില്‍ പാവകളെ തൂക്കിയിടാറുണ്ട്. വെയിലും മഴയും മഞ്ഞും കൊണ്ട് നില്‍ക്കുന്ന ആ പാവകള്‍ കാലങ്ങള്‍ കഴിയുമ്പോള്‍ അസുഖകരമായ ഒരു കാഴ്ചയാണ് സമ്മാനിക്കുന്നത്.