പുകവലിക്കുന്നത് മറ്റുള്ളവർ കാണാതിരിക്കാനായി ഒളിഞ്ഞിരുന്നു വലിക്കുന്ന മനുഷ്യരെ നാം കണ്ടിട്ടുണ്ട്. എന്നാൽ മരത്തിനിടയിൽ ഒളിഞ്ഞിരുന്ന് പുകവലിക്കുന്ന ആനയോ... കഴിഞ്ഞ ദിവസം സാമൂഹ്യമാധ്യമങ്ങളില്‍ പ്രചരിക്കപ്പെട്ട ഒരു വീഡിയോ കണ്ട് എല്ലാവരും ഒന്ന് അന്തംവിട്ടു. മരത്തിനിടയില്‍ മറഞ്ഞ് നിന്ന് പുകവിടുന്ന ആനയുടെ ദൃശ്യങ്ങളാണ് വീഡിയോയില്‍ ഉണ്ടായിരുന്നത്. ഇന്ത്യൻ വൈൽഡ് ലൈഫ് കൺസർവേഷൻ സൊസൈറ്റിയാണ് വീഡിയോ പുറത്തു വിട്ടത്.

കര്‍ണാടകയിലെ നാഗര്‍ഹോള്‍ നാഷ്ണല്‍ പാര്‍ക്കില്‍ നിന്നുള്ള ദൃശ്യമായിരുന്നു അത്. ഫോട്ടോഗ്രാഫര്‍ വിനയ് കുമാറാണ് ഈ വീഡിയോ പോസ്റ്റ് ചെയ്തത്. ആന താഴെ നിന്ന് എന്തോ എടുത്ത് വായിലേക്ക് ഇടുകയും പുകവരുന്നതുമായ ദൃശ്യമാണ് വീഡിയോയില്‍ ഉണ്ടായിരുന്നത്. ആന എന്തായിരിക്കാം വായിലിടുന്നത് എന്നായിരുന്നു പിന്നീട് സോഷ്യല്‍ മീഡിയയില്‍ ചര്‍ച്ച.

യഥാര്‍ത്ഥത്തില്‍ കാട്ടുതീയുടെ അവശിഷ്ടമായി അവിടെ കിടന്ന കരിക്കട്ട കഷ്ണങ്ങളും ചാരവും എടുത്ത് വായിലിട്ട് ആന പുകവിടുകയായിരുന്നു. ആനയ്ക്ക് അതൊരു രസകരമായി തോന്നിയതു കൊണ്ടാകാം അത് ചെയ്തുകൊണ്ടെയിരുന്നു. വീഡിയോ കാണുന്ന ആർക്കും ഒറ്റനോട്ടത്തില്‍ ആന പുകവലിക്കുന്നതായിട്ടേ തോന്നുകയുള്ളൂ. എന്തായാലും പുകലവലിക്കുന്ന ആനയുടെ വീഡിയോ സോഷ്യല്‍ മീഡിയ ഏറ്റെടുത്തുകഴിഞ്ഞു.